AQSh Ukrainadagi “rossiyaparast ayirmachilar”ga qarshi moliyaviy sanksiyalar tayyorlamoqda, bu choralar kamida to‘rt kishiga taalluqli bo‘lishi mumkin, deb yozadi The Wall Street Journal (WSJ) AQSh rasmiylariga tayanib.
Ushbu choralar Ukrainaga qarshi Rossiya bosqining oldini olish uchun diplomatiya va bosimdan foydalanish taktikasining bir qismi sifatida ishlab chiqilmoqda, deydi nashr suhbatdoshlari. Sanksiyalar 20-yanvar kuni e’lon qilinishi mumkin.
Rasmiylarga ko‘ra, yangi sanksiyalar AQSh prezidenti Jo Bayden tomonidan 2021-yilning aprel oyida imzolangan, “Rossiyaning tashqi tajovuzkorligi”da ishtirok etganlarni jazolashga qaratilgan farmoyishiga muvofiq joriy etilmoqda. Ushbu farmon sanksiyalar ro‘yxatiga kiritilgan shaxslarning mol-mulkini muzlatishni nazarda tutadi.
Mavzuga doir: Rossiya Ukrainaga bostirib kiradigan bo‘lsa, AQSh Rossiyaga telefon eksportini taqiqlashi mumkin
Vashington bir necha bor AQSh va ittifoqchilari Ukraina atrofida vaziyat keskinlashgan taqdirda, Rossiyaga qarshi sanksiyalar joriy etishga tayyorligini bildirgan. Avvalroq Oq uy matbuot kotibi Jen Psaki Rossiya Ukrainaga bostirib kirgan taqdirda, Vashington unga qarshi ilgari e’lon qilingan sanksiyalarning birortasini, jumladan, SWIFT banklararo mablag‘ o‘tkazish tizimidan uzib qo‘yish variantini ham istisno qilmasligini aytgan.
Izoh (0)