Bortida Kollektiv Xavfsizlik Shartnomasi Tashkilotining (KXShT) tinchlikparvar kuchlari bo‘lgan Rossiyaning so‘nggi to‘rtta harbiy transport samolyoti Qozog‘iston poytaxtidan havoga ko‘tarildi. Bu haqda Rossiya Mudofaa vazirligiga tayanib, Meduza xabar berdi.
Ushbu samolyotlar Rossiyaga qaytmoqda. Ulardagi tinchlikparvar kontingent qo‘mondonligiga jumladan Rossiya general-polkovnigi Andrey Serdyukov rahbarlik qilmoqda.
“KXShT Kollektiv xavfsizlik kengashi qaroriga muvofiq Qozog‘iston hududida o‘tkazilgan tinchlikparvar operatsiya yakunlandi”, — dedi Serdyukov. U tinchlikparvar kuchlari topshirilgan vazifani muvaffaqiyatli uddalaganini qo‘shimcha qildi.
Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Qozog‘istondagi tartibsizliklar fonida mamlakat bo‘ylab favqulodda holat e’lon qilindi. Mamlakat prezidenti Qosim-Jo‘mart To‘qayev KXShTdan tinchlikparvar kuchlarini yuborishni so‘radi. 6-yanvardan Qozog‘istonga KXShT harbiylarini jo‘natish boshlandi.
Ma’lum qilinishicha, tinchlikparvar kuchlar va texnikalarning barchasi uch kun ichida Qozog‘istonga yetkazilgan. Rossiya harbiy transport samolyotlari nafaqat Rossiyadan, balki missiyada ishtirok etayotgan boshqa mamlakatlardan (KXShT tarkibiga Rossiya, Belarus, Armaniston, Tojikiston va Qirg‘iziston kiradi) ham harbiylarni Qozog‘istonga tashishda va respublikadan olib chiqishda zarur parvozlarni amalga oshirdi.
To‘qayevning so‘roviga binoan tinchlikparvar kontingentning soni 2500 kishidan oshmasligi kerak edi. KXShT bosh kotibi Stanislav Zasning bayonotiga ko‘ra, harbiylarni Qozog‘istonga olib kirish uchun 108 ta reys amalga oshirilgan, unda Rossiyaning 70 dan ortiq Il-76 va beshta An-124 samolyotlari ishtirok etgan.
Tinchlikparvar kuchlar Qozog‘istondagi muhim ob’yektlarni himoyaga olgan. Ularni jangovar harakatlarga safarbar qilish rejalashtirilmagan.
11-yanvar kuni To‘qayev mamlakatdagi vaziyat barqarorlashgani, ikki kundan keyin tinchlikparvar kuchlarni olib chiqish boshlanishi mumkinligini ma’lum qildi. 13-yanvar kuni KXShTga a’zo davlatlarning mudofaa vazirlari tegishli qarorni imzoladi.
Izoh (0)