Farg‘ona shahridagi xonadonlarning birida uch kishi is gazidan zaharlanib, vafot etdi. Bu haqda shahar hokimining mazkur baxtsiz hodisani tekshirish va oqibatlarini bartaraf etish to‘g‘risidagi qarorida ma’lum qilingan.
Ma’lum qilinishicha, 14-yanvar kuni soat 13:00 larda shaharning “Istiqlol” mahallasida yashovchi ikki kishi hamda shu xonadonga mehmonga kelgan bir nafar fuqaro Respublika shoshilinch tibbiy tez yordam ilmiy markazi Farg‘ona filialiga olib borilgan. Tez tibbiy yordam ko‘rsatilganiga qaramasdan, ular shifoxonada vafot etgan.
Sud-tibbiy ekspertizasining dastlabki ma’lumotnomasida fuqarolar is gazidan zaharlangan deb gumon qilinmoqda. Farg‘ona shahri hokimining qarori bilan mazkur baxtsiz hodisa sabablari maxsus ishchi guruh tomonidan o‘rganilmoqda.
Avvalroq Namangandagi xonadonda gaz portlashi oqibatida er-xotin va ularning 3 nafar farzandi kuyib, tan jarohati olgani, Oqqo‘rg‘onda avgust oyida oila qurgan er-xotin is gazidan zaharlanib, vafot etgani, Farg‘onada ota va bola is gazidan zaharlanib, vafot etgani to‘g‘risida xabar berilgandi.
Izoh (0)