Фарғона шаҳридаги хонадонларнинг бирида уч киши ис газидан заҳарланиб, вафот этди. Бу ҳақда шаҳар ҳокимининг мазкур бахтсиз ҳодисани текшириш ва оқибатларини бартараф этиш тўғрисидаги қарорида маълум қилинган.
Маълум қилинишича, 14 январь куни соат 13:00 ларда шаҳарнинг «Истиқлол» маҳалласида яшовчи икки киши ҳамда шу хонадонга меҳмонга келган бир нафар фуқаро Республика шошилинч тиббий тез ёрдам илмий маркази Фарғона филиалига олиб борилган. Тез тиббий ёрдам кўрсатилганига қарамасдан, улар шифохонада вафот этган.
Суд-тиббий экспертизасининг дастлабки маълумотномасида фуқаролар ис газидан заҳарланган деб гумон қилинмоқда. Фарғона шаҳри ҳокимининг қарори билан мазкур бахтсиз ҳодиса сабаблари махсус ишчи гуруҳ томонидан ўрганилмоқда.
Аввалроқ Намангандаги хонадонда газ портлаши оқибатида эр-хотин ва уларнинг 3 нафар фарзанди куйиб, тан жароҳати олгани, Оққўрғонда август ойида оила қурган эр-хотин ис газидан заҳарланиб, вафот этгани, Фарғонада ота ва бола ис газидан заҳарланиб, вафот этгани тўғрисида хабар берилганди.
Изоҳ (0)