O‘zbekistonda 100 yosh va undan oshgan fuqarolarning pensiyasiga pensiyani hisoblashning bazaviy 100 foizi miqdorida qo‘shimcha pul to‘lanadi. Bu haqda Norma xabar qildi.
Qayd etilishicha, qo‘shimcha to‘lov O‘zbekiston fuqarolari, O‘zbekistonda doimiy yashab turgan chet el fuqarolari va fuqaroligi bo‘lmagan shaxslarga to‘lanayotgan pensiyaga qo‘shib belgilanadi. Qo‘shimcha to‘lov:
- 2015-yilning 1-mayiga qadar 100 yoshga to‘lgan va undan oshgan fuqarolarning pensiyasiga 2015-yilning may oyidan boshlab;
- 2015-yilning 1-mayidan keyin 100 yoshga to‘ladigan fuqarolarning pensiyasiga shaxs 100 yoshga to‘lgan oydan keyingi oyning 1-sanasidan boshlab har oyda ariza taqdim etmasdan qo‘shib to‘lanadi.
Qo‘shimcha to‘lov to‘lanadigan 6 oylik davr doimiy yashash uchun O‘zbekiston tashqarisiga ketishdan avvalgi 6 oy uchun qo‘shimcha to‘lovni to‘lash arizada ko‘rsatilgan sanadan boshlab hisoblab chiqiladi. Fuqaroga mablag‘ uning xohishiga ko‘ra ro‘yxatga olingan doimiy yashash yoki vaqtincha turgan joyi bo‘yicha to‘lanadi.
Chet el fuqarosi yoki fuqaroligi bo‘lmagan shaxsga to‘lov yashash guvohnomasi yoki identifikatsiya ID-kartasi amal qiladigan muddat davomida to‘lanadi.
Fuqaroning vafoti munosabati bilan olinmay qolgan qo‘shimcha to‘lovni to‘lash “Fuqarolarning davlat pensiya ta’minoti to‘g‘risida”gi qonunining 63-moddasida (pensionerning vafoti munosabati bilan olinmay qolgan pensiyani to‘lash va dafn etish uchun nafaqa to‘lash) nazarda tutilgan tartibda amalga oshiriladi.
Eslatib o‘tamiz, prezident farmoni bilan 1-sentabrdan boshlab budjet tashkilotlari xodimlarining ish haqi, pensiya, stipendiya va nafaqalar miqdori 1,1 barobarga oshirildi. Farmonga ko‘ra, pensiyani hisoblashning bazaviy miqdori — oyiga 289 000 so‘m etib belgilangan.
O‘zbekistonda 2020-yil 1-oktabr holatiga ko‘ra, pensiya va nafaqa olayotgan 100 yoshga to‘lgan va 100 yoshdan oshganlar soni 794 nafarni tashkil qiladi.
Avvalroq O‘zbekistonda pensiya ta’minoti to‘g‘risidagi qonunga o‘zgartish va qo‘shimchalar kiritilayotgani xabar qilingandi. Yangi qonunga ko‘ra, boquvchisini yo‘qotganlik pensiyasi to‘lovlarini marhumning qaramog‘idagi farzandlariga, ular 18 yoshgacha, agar umumiy o‘rta ta’lim muassasasi, akademik litsey va oliy ta’lim muassasasida o‘qiyotgan bo‘lsa 23 yoshga to‘lgunga qadar boquvchisini yo‘qotganlik pensiyasini to‘lash nazarda tutilgan.
Izoh (0)