Buxoro viloyati G‘ijduvon tumanida 9-yanvar kuni mast erkak qaynotasining Nexia-2 avtomashinasini olib qochib ketdi. Bu haqda Tergov departamenti xabar qildi.
Qayd etilishicha, 12-kuni tumanning “Biyosin” mahallasida yashovchi I.H. (1971-yilda tug‘ilgan) ichki ishlar bo‘limiga ariza bilan murojaat qilgan. U 9-yanvar kuni soat taxminan 17:00 da kuyovi A.I. (1991-yilda tug‘ilgan) yashash uyiga hech kim yo‘qligidan foydalanib kirgani va g‘ayriqonuniy ravishda Nexia-2 avtomashinasini olib qochib ketganini bildirgan. Qaynota kuyoviga nisbatan qonuniy chora ko‘rilishini so‘ragan.
Olib borilgan tergov-tezkor harakatlar davomida YPX inspektorlari 10-yanvar soat 01:25 da A.I. olib qochgan avtomashinasi Buxoro shahri hududida biror-bir hujjatsiz, spirtli ichimliklar ta’sirida boshqarib yurganida qo‘lga olgan. Unga nisbatan belgilangan tartibda ma’muriy bayonnoma rasmiylashtirilib, avtomashina jarima maydonchasiga joylashtirilgan.
Holat yuzasidan A.I.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.
Izoh (0)