O‘zbekistonda 2021-yil boshidan buyon is gazidan zaharlanish va gaz portlashidan vafot etganlar soni ma’lum qilindi

2021-yil 15-dekabrga qadar O‘zbekistonda is gazidan zaharlanish hamda havo-gaz aralashmasi chaqnashi tufayli 125 kishi vafot etgan, 115 kishi jabrlangan. Bu haqda AOKAda o‘tkazilgan brifingda Favqulodda vaziyatlar vazirligi axborot xizmati rahbari Murod Sodiqov ma’lum qildi.

Sodiqovning so‘zlariga ko‘ra, mavsum davomida yuzaga kelishi mumkin bo‘lgan favqulodda vaziyatlarning oldini olish va yong‘in xavfsizligini ta’minlash maqsadida jami 665 ta ishchi guruh tashkil etilib, ularga taalluqli idoralar vakillaridan 9 ming 203 nafar xodim jalb etilgan.

Bundan tashqari, “Hududgazta’minot” AJ, Uy-joy mulkdorlari shirkatlari hamda pech va dudburonlarga xizmat ko‘rsatishga ixtisoslashgan tashkilotlar mutaxassis ustalaridan iborat 204 ta ta’mirlash-tiklash otryadi tashkil etilib, bugungi kunga qadar jami 3,1 milliondan ortiq yakka tartibdagi aholi turar joylari, 35,9 mingta ko‘p qavatli uylarda o‘rganishlar o‘tkazilgan.

Shunga qaramasdan, 2021-yilning 15-dekabr kuniga qadar respublikada aholi orasida is gazidan zaharlanish hamda havo-gaz aralashmasi chaqnashi bilan bog‘liq 213 ta holat qayd etilgan. Ularning 66 tasi favqulodda vaziyat sifatida ro‘yxatga olinib, hodisalar oqibatda 125 kishi vafot etgan va 115 kishi jabrlangan.

Tahlillarga ko‘ra, is gazidan zaharlanish holatlarining aksariyati quyidagi sabablarga ko‘ra yuzaga kelmoqda:

• fuqarolar tomonidan gaz va muqobil yoqilg‘i (ko‘mir, o‘tin va boshqa) turlaridan foydalanishda xavfsizlik choralariga rioya etmaslik;
• nostandart (qo‘lbola yasalgan) yoki sertifikatga ega bo‘lmagan isitish pechlari va anjomlaridan foydalanish;
• isitish pechlarining dudburonlarini noto‘g‘ri o‘rnatish;
• gaz yoki boshqa muqobil yoqilg‘iga moslashtirilgan isitish pechlari (anjomlari)ni dam olish (uxlash) xonalariga olib kirish;
• havo almashmaydigan xonalarni isitishda ochiq olov (ko‘mir va o‘tin cho‘g‘lari)dan foydalanish;
• havoni almashtiruvchi shamollatish shaxtalari yoki tuynuklarni berkitib (to‘sib) qo‘yish shular jumlasidan.

Mutaxassislar tomonidan tahlillar olib borilganda yong‘inlarning 36,3 foizi elektr uskunalaridan foydalanish qoidalarining buzilishi, 27,1 foizi ochiq olovdan ehtiyotsizlik bilan foydalanish, 13,6 foizi isitish pechlarini qurish va ishlatish qoidalarining buzilishi, 9,9 foizi bolalar sho‘xligi oqibatida, 3 foizi gaz jihozlaridan foydalanish qoidalarining buzilishi, shuningdek, 31 tasi gaz va havo aralashmasining chaqnashidan sodir bo‘lgan.

Avvalroq Namangandagi xonadonda gaz portlashi oqibatida er-xotin va ularning 3 nafar farzandi kuyib, tan jarohati olgani, Oqqo‘rg‘onda avgust oyida oila qurgan er-xotin is gazidan zaharlanib, vafot etgani, ​Farg‘onada ota va bola is gazidan zaharlanib, vafot etgani to‘g‘risida xabar berilgandi.