Кўп марталик гипертовушли планерларни учиришга мўлжалланган Американинг улкан икки фюзеляжли Roc самолёти ўзининг учинчи синов парвозини муваффақиятли якунлади. Бу ҳақда ихтирочи компания Stratolaunch Systems’га таяниб, «Интерфакс» хабар берди.
Қанотлари ўлчами дунёдаги энг катта бўлган самолёт Калифорния штатининг Мохаве чўлида жойлашган аэродромдан ҳавога кўтарилган. Тўрт соатдан ортиқ вақт давомида у 6,7 минг метр баландликда турли манёврларни бажариб, муваффақиятли қўнишни амалга оширган.
Олтита двигатель, иккита фюзеляжли Stratalaunch самолётининг қанотлари 117 метрни, самолётнинг ўзининг узунлиги эса 73 метрни ташкил этади. Самолёт оғирлиги 230 тоннага тенг бўлиб, максимал парвоз оғирлиги — тахминан 590 тонна. Самолёт тўлиқ юклама билан 3,7 минг километр масофага парвоз қила олади.
Мазкур самолёт юкларни орбитага олиб чиқишга ёрдам берувчи кўп марталик фойдаланишга мўлжалланган Talon-A гипертовушли планерларини учиришга хизмат қиладиган ҳаво платформаси сифатида синовдан ўтказиляпти. Talon-A узунлиги 8,5 метрни, эни 3,4 метрни, оғирлиги эса 2,72 тоннани ташкил этади. Миссиясини якунлаган Talon-A оддий учиш-қўниш йўлагига қўнишни амалга ошириши кутилмоқда.
Компаниянинг маълум қилишича, гипертовушли планерга эга самолётнинг биринчи парвози 2022 йилга режалаштирилган.
Умумий оғирлиги етти тоннага етадиган фойдалик юк Stratalaunch самолётининг иккита фюзеляжи орасига осилади. У 13,7 минг метр баландликда ҳам парвоз қилиб, ракетани учириши мумкин, шундан сўнг, улар ўз двигателлари ёрдамида орбитага чиқа олади.
Ихтирочиларнинг сўзларига кўра, бу каби усул космик парвозлар жараёнини сезиларли даражада арзонлаштиради, чунки бунда ракета ёнилғиси тежалади.
Stratalaunch самолётнинг биринчи парвози 2019 йилнинг 13 апрелида, иккинчиси 2021 йилнинг 29 апрелида амалга оширилган эди.
Изоҳ (0)