Xakerlar Argentina parlamentining yuqori palatasiga kiberhujum uyushtirdi. Bu haqda mamlakat Senati matbuot xizmati Twitter’dagi sahifasi orqali ma’lum qildi.
“12-yanvar kuni mahalliy vaqt bilan soat 04:00 da Senat xakerlar hujumiga uchradi. Tovlamachi dastur yordamida amalga oshirilgan bu kabi hujumga so‘nggi oylarda turli davlat organlar, sud hokimiyati va yirik kompaniyalar uchragan”, — deyiladi xabarda.
Matbuot xizmatining ma’lumotlariga ko‘ra, xakerlar umumiy foydalanishda bo‘lgan ma’lumotlarni qo‘lga kirita olgan, xolos. “Ayni vaqtda muhim ma’lumotlarning katta qismi qayta tiklandi va sezgir qurilmalar izolyatsiya qilindi, bu bizga ishni yaqin vaqtlarda qayta tiklashga yordam beradi”, — deya ma’lum qiladi matbuot xizmati.
La Nacion gazetasi ma’lumotlariga ko‘ra, xakerlik hujumi parlament yuqori palatasi binosidagi videokuzatuv tizimlariga ham ta’sir ko‘rsatgan.
Avvalroq xakerlar Ukraina hukumati va alohida vazirliklar saytlariga hujum uyushtirgani to‘g‘risida xabar berilgandi. Bir nechta vazirliklar saytida, jumladan, TIV saytiga ham xakerlar bir xil — ukrain, polyak va rus tillarida yozilgan murojaatini qoldirgan. Unda qayd etilishicha, Ukrainaning barcha aholisini shaxsiy ma’lumotlari “umumiy tarmoqqa yuklangan”, kompyuterdagi ma’lumot esa “o‘chirilmoqda va uni qayta tiklab bo‘lmaydi”.
Izoh (0)