Koronavirusning yangi shtammidan xavotirga tushgan Vengriya hukumati COVID-19 ga qarshi vaksinaning to‘rtinchi dozasi bilan emlanishga ruxsat berdi. Bu haqda bosh vazir apparatining rahbari Gergel Gulyashga tayanib, Reuters xabar berdi.
“COVID-19 ga qarshi to‘rtinchi vaksina bilan istalgan odam shifokor konsultatsiyasidan so‘ng emlanishi mumkin, bu boradagi qaror shu hafta e’lon qilinadi”, — deydi u.
Agentlikning ta’kidlashicha, Vengriyada omikron sabab kasallanish holatlari sezilarli darajada oshmoqda.
Bundan tashqari, Vengriya hukumati karantin muddatini 10 kundan 7 kunga qadar qisqartirgan. Gulyash, shu bilan birga, odamlarning test natijasi manfiy chiqsa, karantindan hatto 5 kunda ham chiqishlari mumkinligini ma’lum qilgan.
Ekspertlarning ogohlantirishicha, koronavirusga qarshi qayta vaksinatsiya insonning immun tizimiga salbiy ta’sir ko‘rsatishi mumkin.
Shuningdek, Gretsiya sog‘liqni saqlash vaziri koronavirus bilan kasallanish to‘lqiniga qarshi kurash sifatida joriy etgan cheklovlarini 23-yanvarga qadar uzaytirmoqda.
Amaldagi cheklovlar dekabr oxirida joriy etilib, 3-yanvargacha davom etishi kerak edi. Unga ko‘ra, mamlakatdagi barcha ko‘ngilochar muassasalar yopiladi va bir stol atrofida maksimum olti kishigacha to‘planish mumkin.
Davlat va jamoat sektori ishchilarining yarmi uydan turib ishlashga o‘tgan, supermarketlar va jamoat transportlariga tashrif buyuruvchilar yuqori darajali himoyaga ega (KN95/FFP2) niqobini yoki ikkitalik niqoblarni taqishlari lozim.
Cheklovlar 16-yanvar kuni tugashi kerak edi, ammo u 23-yanvargacha uzaytirildi.
Worldometer sayti ma’lumotlariga ko‘ra, Gretsiyada pandemiya boshlanganidan beri 1,6 millionga yaqin odamda COVID-19 aniqlangan, ularning 21,6 minggi vafot etgan.
Avvalroq Turkiyada koronavirusga qarshi vaksinaning 5-dozasi bilan emlanishga ruxsat berilgani, Isroil hukumati omikron shtammiga qarshi kurashish uchun 60 yoshdan oshgan fuqarolarning barchasiga vaksinaning to‘rtinchi dozasini olishni tavsiya qilgani to‘g‘risida xabar berilgandi.
Izoh (0)