Mudofaani boshqarish milliy markazida 13-yanvar kuni Shavkat Mirziyoyev raisligida Xavfsizlik kengashining kengaytirilgan yig‘ilishi bo‘lib o‘tdi. Bu haqda Prezident matbuot xizmati xabar qildi.
Ma’lum qilinishicha, tadbirda Xavfsizlik kengashi a’zolari, Qurolli Kuchlarimizning qo‘mondonlik tarkibi, harbiy-ma’muriy sektorlar rahbarlari, davlat va jamoat tashkilotlari vakillari ishtirok etgan. Yig‘ilishda Qurolli Kuchlar tizimi va harbiy-ma’muriy sektorlarning 2021-yilgi faoliyati yakunlari tahlil qilinib, galdagi ustuvor vazifalar belgilangan.
Davlat rahbari yig‘ilishda avvalo kadrlar tayyorlash, ilg‘or uslublarni ommalashtirish masalalariga e’tibor qaratgan. Harbiy o‘qituvchilarning malakasini oshirish, Qurolli Kuchlar akademiyasini harbiy ilm-fan dargohiga aylantirish zarurligi ta’kidlangan. Yaqinda ish boshlagan Harbiy meros va zamonaviy tadqiqotlar institutini harbiy ta’lim va ilmiy faoliyat tizimiga samarali integratsiya qilish topshirig‘i berilgan.
2022—2026-yillarda Qurolli Kuchlarni yanada rivojlantirish bo‘yicha konseptual dastur qabul qilish vazifasi qo‘yilgan. Qurolli Kuchlar Bosh shtabi faoliyatini sifat jihatdan yangi pog‘onaga olib chiqish, havo hujumidan mudofaa tizimini kuchaytirish bo‘yicha ko‘rsatmalar berilgan.
Qo‘mondonlik tarkibi zamonaviy operatsiyalarni rejalashtirish, qo‘shinlarni oqilona boshqarish, mavjud kuch va vositalarni samarali qo‘llash bo‘yicha malakasini oshirishi zarurligi ko‘rsatib o‘tilgan. Rahbarlik va qo‘mondonlik lavozimlariga istiqbolli kadrlar zaxirasini yaratish, ularni bu lavozimlarga bosqichma-bosqich tayyorlash hamda tanlov asosida tayinlash muhimligi qayd etilgan.
Jangovar harakatlar dinamikasi oshib borayotgan va yangi usullar paydo bo‘layotgan hozirgi sharoitda muvaffaqiyat, ko‘p jihatdan, komandir-serjant boshqaradigan kichik bo‘linmalar harakatiga bog‘liq. Shu bois Qurolli Kuchlar uchun serjant-yo‘riqchilarni tayyorlash tizimini tubdan takomillashtirish vazifasi qo‘yilgan.
Aholi murojaatlarini ijobiy hal etish, joylarda ijtimoiy, muhandislik va kommunikatsiya infratuzilmasini yaxshilash, bozorlar to‘kinligi va narx-navo barqarorligini ta’minlash bo‘yicha topshiriqlar berilgan.
“Xalqimizning xavfsizligi, tinchligi va osoyishtaligini saqlash bugun ham, kelajakda ham eng ustuvor vazifamiz bo‘lib qoladi. Chunki faqatgina tinchlik-osoyishtalik mamlakatimizning har tomonlama rivojlanishining asosiy kafolatidir. Yangi — 2022-yil hamma sohada, jumladan, Qurolli Kuchlar tizimida ham hal qiluvchi yil bo‘lishi shart”, — degan prezident.
Yig‘ilishda Xavfsizlik kengashi a’zolari, harbiy-ma’muriy sektorlar rahbarlari so‘zga chiqqan. Mamlakatimiz mudofaa qobiliyatini yanada mustahkamlash bo‘yicha chora-tadbirlar belgilangan.
Mavzuga doir:
Izoh (0)