“Xalqaro shartnomaga qo‘shilish to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga muvofiq, O‘zbekiston ko‘zi ojiz, ko‘rishda nuqsoni bo‘lgan va bosma axborotni idrok etishda boshqa jihatdan qobiliyati cheklangan shaxslarning nashr etilgan asarlardan foydalanishini yengillashtirish to‘g‘risidagi Marokash shartnomasiga (2013-yil 27-iyun, Marokash) qo‘shilgan.
Axborot va ommaviy kommunikatsiyalar agentligi mazkur xalqaro shartnomani amalga oshirish yuzasidan mas’ul vakolatli organ etib belgilangan.
Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirgandan keyin O‘zbekistonning majburiyatlari bajarilishini ta’minlaydi.
Avvalroq O‘zbekistonda BMTning Nogironlar huquqlari to‘g‘risidagi konvensiyasi kuchga kirgani, shuningdek, Xalqaro mehnat tashkilotining yana ikkita konvensiyasini ratifikatsiya qilish niyatida ekani to‘g‘risida xabar berilgandi.
Izoh (0)