Osiyo futbol konfederatsiyasi Chempionlar Ligasi mavsumining “kuz-bahor” tizimiga o‘tganini rasman e’lon qildi. Bu haqda futbol mutaxassisi Alisher Nikimbayev xabar berdi.
Qayd etilishicha, yangi tizimga o‘tish keyingi yilda sodir bo‘ladi. Joriy mavsum esa o‘tish davri vazifasini bajarib beradi — 2022-yilning mart oyida boshlanib, 2023-yilning fevralida tugaydi.
Shuningdek, Chempionlar Ligasining G‘arbiy mintaqasi guruh bosqichi o‘yinlari vaqti ham o‘zgargan. Bahslar avval may oyiga rejalashtirilgan bo‘lsa, endi 7—27-aprel kunlari markazlashgan holda bo‘lib o‘tishi ma’lum qilindi. Pley-off o‘yinlari esa 2023-yil fevral oyida o‘tkaziladi.
Eslatib o‘tamiz, bu yilgi bahslarda O‘zbekiston nomidan ikki klub musobaqada qatnashadi. Mamlakat chempioni “Paxtakor” to‘g‘ridan to‘g‘ri guruh bosqichiga yo‘l olgan bo‘lsa, “Nasaf” pley-off o‘yinida BAAning “Baniyas” klubiga qarshi saf tortadi. Agar Ro‘ziqul Berdiyev jamoasi guruh bosqichi yo‘llanmasini qo‘lga kiritsa, Superligada 2-o‘rinni egallagan “So‘g‘diyona” OFK Kubogi guruh bosqichida o‘ynaydi.
Guruh bosqichiga qur’a tashlash marosimi 17-yanvar kuni bo‘lib o‘tadi.
Izoh (0)