Saidyoqub Qahramonovning UFC’dagi 2-jangi bekor qilindi, o‘zbekistonlik yakkakurashchida koronavirus aniqlandi

O‘zbekistonlik UFC jangchisi Saidyoqub Qahramonov navbatdagi jangi bekor qilindi. Bu haqda sportchining o‘zi Instagram sahifasida ma’lum qildi.

Qahramonovning so‘zlariga ko‘ra, unda koronavirus aniqlangan, shu sababli jang bekor qilingan.

Shu shanbada ko‘z o‘ngingizda jang qilishni istardim, lekin Xudoning o‘z rejalari bor. Jangga 100 foiz tayyor edim. Las-Vegasga uchishdan oldin koronavirus uchun test topshirdim, natija salbiy chiqdi. Yetib kelgach esa test ijobiy natija berdi. Men o‘zimni yaxshi his qilyapman, simptomlar yo‘q.

Saidyoqub Qahramonov, UFC jangchisi

Qahramonov UFC’dagi debyut jangida Guam vakili Trevin Jonsni muddatidan avval mag‘lub etgandi.

Saidyoqub Qahramonov 1995-yilning 14-noyabrida Samarqandda tug‘ilgan. UFC’ga o‘tguniga qadar sportchi professional MMA’da o‘nta jang o‘tkazib, ularning 8 tasida g‘olib bo‘lgan va ikkita jangda yutqazgan. Mag‘lubiyatlaridan birini hozirda UFC’da ishtirok etayotgan Umar Nurmagomedovdan qabul qilib olgan.