Ikki vazn toifasida UFC sobiq chempioni Konor Makgregor Instagram sahifasida OLBG platformasi tahlilchilari tomonidan tuzilgan eng ko‘p maosh oluvchi sportchilar reytingini e’lon qildi.
Unga ko‘ra, irlandiyalik jangchi 2021-yilda oktagonda o‘tkazgan har bir daqiqasi uchun 8,6 million dollar ishlab topgan.
Ikkinchi o‘rindan ringda bir daqiqada 444 ming dollar ishlab topgan boks bo‘yicha supero‘rta vazn toifasining mutlaq chempioni Saul “Kanelo” Alvares joy olgan. Uchinchi o‘ringa esa amerikacha futbol vakili Tom Bredi joylashtirildi — daqiqasiga 37 ming dollar.
Reytingni “PSJ” hujumchisi Neymar (32 ming dollar) va “Manchester Yunayted” forvardi Krishtianu Ronaldu (18 ming dollar) yakunlab bergan.
Eslatib o‘tamiz, Konor Makgregor 2021-yilda Dastin Poryega qarshi ikkita jang o‘tkazib, har ikkala bahsda mag‘lubiyatga uchradi. 24-yanvarda o‘tkazilgan jangda nokautga uchragan bo‘lsa, 11-iyul sanasidagi bellashuvda oyog‘i sinishi oqibatida jangni davom ettira olmadi.
Izoh (0)