O‘zbekistonda koronavirus infeksiyasi bilan bog‘liq vaziyatning keskinlashuvi paytida maktabgacha ta’lim tashkilotlarida karantin qoidalariga qat’iy rioya qilinadi. Bu haqda Maktabgacha ta’lim vazirligi xabar qildi.
Qayd etilishicha, davlat bog‘chalarida COVID-19 pandemiyasi davrida maktabgacha ta’lim tashkilotlarining ish faoliyatiga qo‘yiladigan vaqtinchalik sanitariya-gigiyenik talablarga qat’iy rioya etiladi. Muassasada bayram tadbirlari o‘tkazilishi vaqtinchalik cheklanadi.
Ota-onalar va tashqaridan mehmonlar kirishiga yo‘l qo‘yilmaydi. Zarur vaziyatlarda so‘nggi uch kunlik PZR testi va emlanganligi haqida sertifikati bo‘lishi lozim.
Yig‘ilishlar o‘tkazilishi cheklanadi, zarur hollarda yig‘ilishlarni videokonferensaloqa rejimida o‘tkazish choralari ko‘riladi. Mazkur cheklovning buzilishiga yo‘l qo‘yilgan taqdirda tegishli tartibda javobgarlik choralari qo‘llaniladi.
Eslatib o‘tamiz, mamlakatga kelgan xorijiy davlat fuqarosidan COVID-19 ning yangi “omikron” shtammi joriy yilning 7-yanvar kuni aniqlangan. Shu sababli barcha tashkilot, korxona va muassasalarda, yirik savdo majmualari, supermarketlar, ko‘ngilochar muassasalarning kirish qismida niqobda bo‘lish, ijtimoiy masofani saqlash, tana haroratini o‘lchash amaliyotiga qat’iy rioya etilishi ta’minlanadi.
Shuningdek, emlanmagan xodimlar ishga qo‘yilmaydi. Vazirlik va idora rahbarlari, tashkiliy shaklidan qat’iy nazar, barcha tashkilotlarda ishchilarning emlangandan so‘ng ish joylariga kiritishga ruxsat beriladi. Tartibni buzgan tashkilot rahbarlariga nisbatan qonun hujjatlarida belgilangan tartibda qat’iy chora ko‘riladi.
Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi. Ushbu tadbirlarga OTM rahbarlari shaxsan mas’ul etib belgilanadi.
Mavzuga doir:
Izoh (0)