Ўзбекистонда коронавирус инфекцияси билан боғлиқ вазиятнинг кескинлашуви пайтида мактабгача таълим ташкилотларида карантин қоидаларига қатъий риоя қилинади. Бу ҳақда Мактабгача таълим вазирлиги хабар қилди.
Қайд этилишича, давлат боғчаларида COVID-19 пандемияси даврида мактабгача таълим ташкилотларининг иш фаолиятига қўйиладиган вақтинчалик санитария-гигиеник талабларга қатъий риоя этилади. Муассасада байрам тадбирлари ўтказилиши вақтинчалик чекланади.
Ота-оналар ва ташқаридан меҳмонлар киришига йўл қўйилмайди. Зарур вазиятларда сўнгги уч кунлик ПЗР тести ва эмланганлиги ҳақида сертификати бўлиши лозим.
Йиғилишлар ўтказилиши чекланади, зарур ҳолларда йиғилишларни видеоконференцалоқа режимида ўтказиш чоралари кўрилади. Мазкур чекловнинг бузилишига йўл қўйилган тақдирда тегишли тартибда жавобгарлик чоралари қўлланилади.
Эслатиб ўтамиз, мамлакатга келган хорижий давлат фуқаросидан COVID-19 нинг янги «омикрон» штамми жорий йилнинг 7 январь куни аниқланган. Шу сабабли барча ташкилот, корхона ва муассасаларда, йирик савдо мажмуалари, супермаркетлар, кўнгилочар муассасаларнинг кириш қисмида ниқобда бўлиш, ижтимоий масофани сақлаш, тана ҳароратини ўлчаш амалиётига қатъий риоя этилиши таъминланади.
Шунингдек, эмланмаган ходимлар ишга қўйилмайди. Вазирлик ва идора раҳбарлари, ташкилий шаклидан қатъий назар, барча ташкилотларда ишчиларнинг эмлангандан сўнг иш жойларига киритишга рухсат берилади. Тартибни бузган ташкилот раҳбарларига нисбатан қонун ҳужжатларида белгиланган тартибда қатъий чора кўрилади.
Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади. Ушбу тадбирларга ОТМ раҳбарлари шахсан масъул этиб белгиланади.
Изоҳ (0)