Серхио Роберто маошининг пасайишига рози бўлмаса, «Барселона» Ферран Торресни рўйхатдан ўтказа олмаслиги мумкин

«Барселона» 12 январь куни Испания Суперкубоги ярим финалида «Реал»га қарши ўйнайди.

Каталонияликлар учрашувга қадар Ферран Торресни рўйхатдан ўтказишига умид қилмоқда. «Кўк-анорранглилар» директори Матеу Алемани бош мураббий Хавига яқин 48 соат ичида ярим ҳимоячини рўйхатдан ўтказиш ва унинг Мадрид жамоасига қарши баҳсда қайдномага кириши учун қўлидан келган барча ишни қилишга ваъда берди.

Ҳозирча бунинг учун Филиппе Коутиньонинг «Астон Вилла»га кетиши етарли бўлмади, энди каталонияликлар Серхи Роберто билан маошини пасайтириш борасида музокаралар олиб бормоқда. Робертонинг «Барселона» билан шартномаси 2022 йилнинг июнида якунига етади ва футболчи жамоада қолиш истагида. Ҳозирда клуб у билан маоши пасайтирилган ҳолда янги шартнома имзоланишига умид қилмоқда.

Шу тариқа агар Торреснинг коронавирусга топширган тести манфий чиқса ва клуб уни рўйхатдан ўтказа олса, футболчи жамоа билан бирга Саудия Арабистонига учиб кетади.

Шунингдек, клуб раҳбарияти Робертодан ташқари бошқа футболчилар билан ҳам шундай йўл тутмоқчи. Жамоа Самюуэль Умтити ва Юсуф Демирга харидор изламоқда. 18 ёшли австриялик футболчи «Барселона» сафида яна битта ўйинда майдонга тушса, «Рапид»га 10 миллион евро тўлаб бериш лозим бўлади.