O‘zbekistondan Qozog‘istonning Olmaota va Aqto‘be shaharlariga parvozlar bekor qilindi. Bu haqda Uzbekistan Airways xabar qildi.
Ma’lum qilinishicha, 6-yanvarga mo‘ljallangan HY9729/9730 Nukus—Aqto‘be—Nukus va HY763/764 Toshkent—Olmaota—Toshkent yo‘nalishlari bo‘yicha aviaqatnovlari yetib boradigan aeroportlarning texnik sabablariga ko‘ra bekor qilingan.
Ushbu yo‘nalish bo‘yicha parvozlarni amalga oshirish kunlari haqidagi ma’lumot qo‘shimcha e’lon qilinadi.
Yo‘lovchilar bekor bo‘lgan parvoz aviachiptalarining to‘liq qiymatini chipta sotib olingan joyda qaytarib olish yoki boshqa sanaga bepul qayta bronlash huquqiga ega.
“To‘g‘ri tushunishingizni umid qilamiz”, — deyiladi Uzbekistan Airways xabarida.
Eslatib o‘tamiz, Aqtau xalqaro aeroporti xalqaro parvozlarni qabul qilishni va amalga oshirishni yopgani munosabati bilan 5-yanvar kuni amalga oshirilishi rejalashtirilgan HY-9725/9726 Urganch—Aqtau—Urganch yo‘nalishi bo‘yicha muntazam qatnovlar ham bekor qilingandi.
2-yanvardan beri Qozog‘istonda namoyishlar bo‘lib o‘tmoqda. U Qozog‘istonning Mangistau viloyati Janaozen shahrida avtomobil egalari suyultirilgan gaz narxi ikki baravarga (60 tengedan 120 tengega) ko‘tarilganidan norozi bo‘lib, ommaviy mitingga chiqishi bilan boshlangan edi. Shundan keyin namoyishlar Aqtau viloyati markazida ham bo‘lib o‘tdi, so‘ngra Qozog‘istonning boshqa hududlariga, jumladan, poytaxt Nur-Sulton shahriga va sobiq poytaxt Olmaotaga ham tarqala boshladi.
Izoh (0)