Польшанинг Варшава шаҳрида 25—31 декабрь кунлари шахматнинг рапид ва блитс йўналишлари бўйича Жаҳон чемпионати ўтказилди. Унда Ўзбекистон номидан иштирок этган Нодирбек Абдусатторов рапид йўналишида мусобақа ғолиблигини қўлга киритди. У бу йўлда Ян Непомняший, Магнус Карлсен каби номдор шахматчиларни мағлубиятга учратгани алоҳида таъкидлашга лойиқ.
3 январь, душанба куни Миллий олимпия қўмитасида 17 ёшли шахматчини тақдирлаш маросими ўтказилди. Тадбирда президент маслаҳатчиси Абдужаббор Абдувоҳидов, президент матбуот котиби Шерзод Асадов, бош вазир ўринбосари, туризм ва спорт вазири Азиз Абдуҳакимов, Ёшлар ишлари агентлиги директори Алишер Саъдуллаев иштирок этди.
Тадбир аввалида Абдужаббор Абдувоҳидов Нодирбек Абдусатторовга Шавкат Мирзиёевнинг табригини ўқиб эшиттирди ва унга «Мард ўғлон» давлат мукофотини топширди.
Шундан сўнг Нодирбекка Тошкент шаҳридан икки хонали уйнинг калити ва 250 миллион сўм тақдим этилди.
Шунингдек, Абдусатторовнинг устозларига 100 миллион сўмдан, блиц йўналишида муваффақиятли иштирок этган Жавоҳир Синдоровга 50 миллион сўм пул мукофоти берилди. Бундан ташқари, ЖЧ қатнашчилари Жаҳонгир Воҳидов ва Шамсиддин Воҳидов ҳам тақдирланди.
МОҚдаги тадбирдан сўнг жаҳон чемпионати иштирокчилари ва расмийлар «Янги Ўзбекистон» боғида ташкил этилган учрашувга йўл олди. «Дарё» ушбу маросимлардан тайёрланган суратларни тақдим этади.
«Президентимиз ва ҳукуматимизнинг бундай эътиборидан хурсандман. Ишонтириб айтаманки, бу энди бошланиши, ғалабалар бардавом бўлади. Насиб қилса, келгусида классик йўналишда ҳам жаҳон тожини Ўзбекистонга олиб келамиз», – дейди Нодирбек Абдусатторов.
МОҚдаги тадбирдан кейин маросим иштирокчилари «Янги Ўзбекистон» боғига йўл олди.
Нодирбек Абдусатторов 2017 йилда, 13 ёшида гроссмейстерлик унвонини олган. 2021 йил январь ҳолатига кўра, Абдусатторов шахмат тарихидаги энг ёш бешинчи гроссмейстер бўлиб турибди. У 2018 йилда Ўзбекистон терма жамоаси сафида Бутунжаҳон шахмат Олимпиадасида биринчи ўринни қўлга киритганди ва президент совғаси — Spark автомобилини қабул қилиб олганди.
Қайд этиш керак, Абдусатторов Магнус Карлсенни мағлуб этган ўзбекистонлик иккинчи шахматчига айланди. 2018 йилда 16 ёшли Шамсиддин Воҳидов Санкт-Петербургда норвегиялик шахматчидан устун келганди.
Изоҳ (0)