Jeki Shroff Dev Anandning “Xayoliy avliyo” (1982) filmida debyut qilganida, deyarli hech kim yosh yigitga e’tibor qaratmagan. Jeki o‘sha vaqtda atigi 25 yoshda edi, u modellik karyerasini tark etishga va kino olamida o‘z o‘rnini topishga qaror qildi. Bir kuni rejissor Subxash Gxay o‘zining “Garovga olingan” (1983) romantik filmida bosh qahramon rolini o‘ynash uchun aktyor qidirayotgan vaqtda uni ko‘rib qoldi.
Jeki Shroff 1957-yil 1-fevralda Mumbayda tug‘ilgan. Uning haqiqiy ismi Jaykishen Kakubxay Shroff. Otasi Gujaratdan, onasi esa turkmanistonlik. Intervyulardan birida Jeki onasi tomonidan turkman ekanini aytib o‘tgan, lekin oila Qozog‘istonda yashagan, keyin buvisi va yetti qizi Ladaxga, keyinroq Dehliga va nihoyat Mumbayga ko‘chib o‘tgan.
Ota-onasi 18 yoshga to‘lmay tanishib, turmushga qurgan. Ularning so‘zlariga ko‘ra, Jeki yoshligida bezori bo‘lgan va uning noodatiy qiyofasi va hindlarga xos bo‘lmagan ko‘rinishi bilan ba’zi modellik agentliklarining e’tiborini tortgan va ular unga ish taklif qila boshlagan. Yigit 11-sinfdan keyin maktabni tashlashga to‘g‘ri keldi, chunki uning oilasi nochor edi.
“Biz juda kambag‘al bo‘lsak ham, lekin ahil edik. Mening katta akam barcha kambag‘alga g‘amxo‘rlik qildi, hammaga yordam berdi. Afsuski, u vafot etdi. Birovni qutqarish uchun dengizga sakradi. Ammo uning o‘zi suzishni bilmas edi, shuning uchun u ham cho‘kib ketdi. Men unga arqon tashladim, u arqonni ushlab turdi, bir necha soniya suzdi, lekin arqon uning qo‘lidan sirg‘alib chiqib ketdi. Men juda kichikkina edim va qo‘rqib ketdim. O‘sha yerda turib, uning cho‘kib ketishini kuzatardim, xolos. Shundan so‘ng men akam kabi qashshoq qo‘shnilarimga g‘amxo‘rlik qilishga qaror qildim”, — deydi Jeki.
Jeki taom tayyorlashni yaxshi ko‘rardi. U Taj mehmonxonasida oshpazga shogird va Air India aviakompaniyasida bord nazoratchisi sifatida ishga kirishga harakat qildi, ammo malakasi yo‘qligi sababli hamma joydan rad javobini oldi. Bir kuni avtobus bekatida bir kishi to‘xtadi va model bo‘lib ishlashni xohlaysizmi, deb so‘radi. “Menga pul berasizmi?” — deya savol berdi Jeki birinchi navbatda.
Ertasi kuni Jeki kostyum va ko‘ylaklar uchun fotosessiyada suratga tushdi. Shu paytdan boshlab uning shon-shuhrat sari sayohati boshlandi.
Dev Anand Shroff bilan tanishganida atigi 24 yoshda edi. So‘ngra Minakshi Sheshadri bilan birgalikda “Garovga olingan” filmi muvaffaqiyatga erishdi. Rejissor Subxash Gxay o‘z qahramoniga Jeki deb nom berdi va yigit uni taxallus sifatida olishga qaror qildi. O‘shandan keyin Jeki Shroff deyarli har bir Gxay loyihasida ishtirok etdi.
Bollivudda qirq yildan ortiq vaqt davomida Jeki Shroff o‘n uch — hind, tamil, telugu, konkan, kannada, marathi, odiya, panjob, bengal, malayalam, bxojpuri, gujarat va ingliz tilida 220 dan ortiq filmlarda rol o‘ynagan. Boshqalar qatorida u to‘rtta Filmfare mukofotiga sazovor bo‘lgan va bir nechta muvaffaqiyatli qisqa metrajli filmlarda rol o'ynagan.
U rafiqasi, yarmi bengal va yarmi belgiyalik Ayesha Datt bilan 1973-yilda tanishgan. O‘sha vaqtda aktyor 16 yoshda, Ayesha esa endigina 13 yoshda edi. Ayesha maktab formasida avtobusda ketayotib, Jekining e’tiborini tortdi. Shu tariqa juftlik avtobusda tanishdi va ularning sevgi hikoyasi boshlandi.
Asli qirollik oilasidan bo‘lgan, dabdabali hayotga o‘rgangan Ayesha Jekidan hayratda edi. Jeki kam pul ishlab topayotgani uchun ikkalasi ham ko‘pincha piyoda yurar va har oqshomlarni shaharga sayohat qilar edi.
Intervyularining birida Jeki Shroff shunday deydi: “Men Ayesha uchun o‘zgardim. Men uchun u o‘zining borligi bilan hayotimni bezatgan ma’budaga o‘xshardi. U men bilan qiyin sharoitda yashashga rozi bo‘ldi va men ham o‘zgarishim kerakligini angladim. Men erishgan barcha narsa Ayesha tufaylidir”.
Jeki haqida Ayesha shunday deydi: “Men juda yuzaki edim, u menga boshqalarga ko‘proq g‘amxo‘rlik qilishni o‘rgatdi”.
Bir necha yil o‘tgach, Ayesha Filippinning Manila shahrida bo‘lib o‘tgan “Miss young world” tanlovida Hindistonni himoya qildi va u yerda “Tanlovning eng mashhur qizi” unvoni bilan taqdirlandi.
1984-yilda u Bollivudda “Teri Baaxon Mein” filmi bilan debyut qildi, ammo bu uning yagona loyihasi bo‘lib qoldi, chunki film chiqqandan keyin Ayesha produser bo‘lishga qaror qildi.
Ayesha 1987-yil 5-iyun kuni o‘zining tug‘ilgan kunida Jeki bilan turmush qurdi. 1990-yilda ularning birinchi farzandi – o‘g‘li Jay Xemant (Tayger Shroff) va uch yildan so‘ng qizi Krishna tug‘ildi. To‘ydan so‘ng Ayesha va Jeki o‘zlarining prodyuserlik markazini ochdi, shundan so‘ng ular bir nechta filmlarni yaratish ustida birga ishladi. Ularning o‘g‘li Tayger ham aktyor va hozirda Bollivuddagi eng istiqbolli yosh aktyorlardan biri hisoblanadi.
Er-xotinning organik fermasi ham bor, ularda organik o‘simliklar, daraxtlar va o‘tlar yetishtiriladi. Jeki ko‘p yillar davomida xayriya ishlari bilan shug‘ullanadi va kam ta’minlangan oilalar farzandini davolash va o‘qitish uchun katta mablag‘ ajratadi.
Aytgancha, Jeki Shroffning otasi munajjim bo‘lgan va o‘g‘li hali yo‘rgakda ekanida,uning kelajakda mashhur bo‘lishini bashorat qilgan. Aktyor hali ham filmlarda o‘ynab, tomoshabinlar e’tirofiga sazovor bo‘lmoqda.
Izoh (0)