Жеки Шрофф Дев Ананднинг «Хаёлий авлиё» (1982) фильмида дебют қилганида, деярли ҳеч ким ёш йигитга эътибор қаратмаган. Жеки ўша вақтда атиги 25 ёшда эди, у моделлик карьерасини тарк этишга ва кино оламида ўз ўрнини топишга қарор қилди. Бир куни режиссёр Субхаш Гхай ўзининг «Гаровга олинган» (1983) романтик фильмида бош қаҳрамон ролини ўйнаш учун актёр қидираётган вақтда уни кўриб қолди.
Жеки Шрофф 1957 йил 1 февралда Мумбайда туғилган. Унинг ҳақиқий исми Жайкишен Какубхай Шрофф. Отаси Гужаратдан, онаси эса туркманистонлик. Интервьюлардан бирида Жеки онаси томонидан туркман эканини айтиб ўтган, лекин оила Қозоғистонда яшаган, кейин бувиси ва етти қизи Ладахга, кейинроқ Деҳлига ва ниҳоят Мумбайга кўчиб ўтган.
Ота-онаси 18 ёшга тўлмай танишиб, турмушга қурган. Уларнинг сўзларига кўра, Жеки ёшлигида безори бўлган ва унинг ноодатий қиёфаси ва ҳиндларга хос бўлмаган кўриниши билан баъзи моделлик агентликларининг эътиборини тортган ва улар унга иш таклиф қила бошлаган. Йигит 11-синфдан кейин мактабни ташлашга тўғри келди, чунки унинг оиласи ночор эди.
«Биз жуда камбағал бўлсак ҳам, лекин аҳил эдик. Менинг катта акам барча камбағалга ғамхўрлик қилди, ҳаммага ёрдам берди. Афсуски, у вафот этди. Бировни қутқариш учун денгизга сакради. Аммо унинг ўзи сузишни билмас эди, шунинг учун у ҳам чўкиб кетди. Мен унга арқон ташладим, у арқонни ушлаб турди, бир неча сония сузди, лекин арқон унинг қўлидан сирғалиб чиқиб кетди. Мен жуда кичиккина эдим ва қўрқиб кетдим. Ўша ерда туриб, унинг чўкиб кетишини кузатардим, холос. Шундан сўнг мен акам каби қашшоқ қўшниларимга ғамхўрлик қилишга қарор қилдим», — дейди Жеки.
Жеки таом тайёрлашни яхши кўрарди. У Таж меҳмонхонасида ошпазга шогирд ва Air India авиакомпаниясида борд назоратчиси сифатида ишга киришга ҳаракат қилди, аммо малакаси йўқлиги сабабли ҳамма жойдан рад жавобини олди. Бир куни автобус бекатида бир киши тўхтади ва модель бўлиб ишлашни хоҳлайсизми, деб сўради. «Менга пул берасизми?» — дея савол берди Жеки биринчи навбатда.
Эртаси куни Жеки костюм ва кўйлаклар учун фотосессияда суратга тушди. Шу пайтдан бошлаб унинг шон-шуҳрат сари саёҳати бошланди.
Дев Ананд Шрофф билан танишганида атиги 24 ёшда эди. Сўнгра Минакши Шешадри билан биргаликда «Гаровга олинган» фильми муваффақиятга эришди. Режиссёр Субхаш Гхай ўз қаҳрамонига Жеки деб ном берди ва йигит уни тахаллус сифатида олишга қарор қилди. Ўшандан кейин Жеки Шрофф деярли ҳар бир Гхай лойиҳасида иштирок этди.
Болливудда қирқ йилдан ортиқ вақт давомида Жеки Шрофф ўн уч — ҳинд, тамил, телугу, конкан, каннада, маратҳи, одия, панжоб, бенгал, малаялам, бхожпури, гужарат ва инглиз тилида 220 дан ортиқ фильмларда рол ўйнаган. Бошқалар қаторида у тўртта Filmfare мукофотига сазовор бўлган ва бир нечта муваффақиятли қисқа метражли фильмларда рол ўйнаган.
У рафиқаси, ярми бенгал ва ярми бельгиялик Аеша Датт билан 1973 йилда танишган. Ўша вақтда актёр 16 ёшда, Аеша эса эндигина 13 ёшда эди. Аеша мактаб формасида автобусда кетаётиб, Жекининг эътиборини тортди. Шу тариқа жуфтлик автобусда танишди ва уларнинг севги ҳикояси бошланди.
Асли қироллик оиласидан бўлган, дабдабали ҳаётга ўрганган Аеша Жекидан ҳайратда эди. Жеки кам пул ишлаб топаётгани учун иккаласи ҳам кўпинча пиёда юрар ва ҳар оқшомларни шаҳарга саёҳат қилар эди.
Интервьюларининг бирида Жеки Шрофф шундай дейди: «Мен Аеша учун ўзгардим. Мен учун у ўзининг борлиги билан ҳаётимни безатган маъбудага ўхшарди. У мен билан қийин шароитда яшашга рози бўлди ва мен ҳам ўзгаришим кераклигини англадим. Мен эришган барча нарса Аеша туфайлидир».
Жеки ҳақида Аеша шундай дейди: «Мен жуда юзаки эдим, у менга бошқаларга кўпроқ ғамхўрлик қилишни ўргатди».
Бир неча йил ўтгач, Аеша Филиппиннинг Манила шаҳрида бўлиб ўтган «Miss young world» танловида Ҳиндистонни ҳимоя қилди ва у ерда «Танловнинг энг машҳур қизи» унвони билан тақдирланди.
1984 йилда у Болливудда «Teri Baaxon Mein» фильми билан дебют қилди, аммо бу унинг ягона лойиҳаси бўлиб қолди, чунки фильм чиққандан кейин Аеша продусер бўлишга қарор қилди.
Аеша 1987 йил 5 июнь куни ўзининг туғилган кунида Жеки билан турмуш қурди. 1990 йилда уларнинг биринчи фарзанди – ўғли Жай Хемант (Тайгер Шрофф) ва уч йилдан сўнг қизи Кришна туғилди. Тўйдан сўнг Аеша ва Жеки ўзларининг продюсерлик марказини очди, шундан сўнг улар бир нечта фильмларни яратиш устида бирга ишлади. Уларнинг ўғли Тайгер ҳам актёр ва ҳозирда Болливуддаги энг истиқболли ёш актёрлардан бири ҳисобланади.
Эр-хотиннинг органик фермаси ҳам бор, уларда органик ўсимликлар, дарахтлар ва ўтлар етиштирилади. Жеки кўп йиллар давомида хайрия ишлари билан шуғулланади ва кам таъминланган оилалар фарзандини даволаш ва ўқитиш учун катта маблағ ажратади.
Айтганча, Жеки Шроффнинг отаси мунажжим бўлган ва ўғли ҳали йўргакда эканида,унинг келажакда машҳур бўлишини башорат қилган. Актёр ҳали ҳам фильмларда ўйнаб, томошабинлар эътирофига сазовор бўлмоқда.
Изоҳ (0)