“Endi gazimizni arzon-garovga chetga sotmasdan, o‘zimiz qayta ishlaymiz va ko‘proq daromad olamiz” — Shavkat Mirziyoyev

Shavkat Mirziyoyev Uzbekistan GTL zavodi ochilish marosimioldi taqdimotida O‘zbekistonning yerosti boyliklari xalqniki ekanligi va shunday bo‘lib qolishi kerakligi haqida gapirib o‘tdi.

“Bu zavodlar, topilayotgan konlar eng avvalo o‘zbek xalqiga manfaat olib kelishi kerak. Har bir ‘skvajina’ni ‘siz’ deyishimiz kerak. Axir bu Allohning xalqimizga bergan ne’mati-ku. Buning qadriga yetishimiz kerak.

Afsuski, uzoq yillar biz unaqa qilmadik. Qayerdan kon topsak, sotdik. Topdik, sotdik. Eng alam qiladigani, o‘zimizning boyliklarni xorijdagilarga yalingudek bo‘lib sotdik. Xalqni o‘ylamadik. Xuddi O‘zbekistonda vaqtincha yashayotganday ish tutdik, “ertaga bu yurtda nima bo‘lsa ham menga qizig‘i yo‘q” degan prinsip bo‘ldi.

Endi bunaqa bo‘lmaydi. Alloh taolo o‘zbek xalqiga bergan boyliklari faqat xalqimizga xizmat qilishi kerak. Boshqacha bo‘lishiga yo‘l qo‘ymayman.

Endi gazimizni arzon-garovga chetga sotmasdan, o‘zimiz qayta ishlaymiz va ko‘proq daromad olamiz. Mana, paxta bo‘yicha xuddi shu tizimni yo‘lga qo‘ya oldik-ku, gazda ham shunaqa qilamiz”, — dedi Shavkat Mirziyoyev.