“Endi sifatli aviakerosinimiz bor. Biz Navoiyda aviaxab tashkil etamiz. Boshqa davlatlar uchun aviaxizmatlar ko‘rsatishimiz mumkin” – Shavkat Mirziyoyev

Shavkat Mirziyoyev Uzbekistan GTL majmuasi ochilishida nutq so‘zlab, majmua ahamiyati haqida gapirdi.

Uzbekistan GTL majmuasida yiliga 3,6 milliard metr kub tabiiy gaz qayta ishlanib, qiymati 1 milliard dollardan ziyod bo‘lgan 1,5 million tonna tayyor suyuq mahsulotlar ishlab chiqariladi. Jumladan, 307 ming tonna aviakerosin, 724 ming tonna dizel yoqilg‘isi, 437 ming tonna nafta, 53 ming tonna suyultirilgan gaz tayyorlanadi.

Shavkat Mirziyoyev ushbu mahsulotlar hisobiga yiliga 500 million dollarlik import o‘rni qoplanib, 200 million dollarlik eksport va 2 trillion so‘mlik soliq tushumlari ta’minlanishini aytdi:

“Alohida ta’kidlash kerak, biz 300 million dollarlik gazni qayta ishlab, uni qiymati 3 barobar yuqori va dunyo bozorida talab katta bo‘lgan tayyor mahsulotlarga aylantiramiz. Buning uchun to‘la asosimiz bor. Chunki bu yerda ishlab chiqarilgan aviakerosin boshqa zavodlar mahsulotiga nisbatan juda toza va sifatli bo‘lib, eng zamonaviy samolyotlarga mo‘ljallangani uchun unga hamisha talab yuqori hisoblanadi”, – deydi davlat rahbari.