Byuroning Namangan shahar bo‘limida shahar sudining 2021-yil 4-oktabrdagi ijro varaqasiga asosan ashyoviy dalil sifatida olingan qalbaki 19 500 AQSh dollari yo‘q qilindi. Bu haqda “Daryo” muxbiri Azizbek Abduvaliyev xabar bermoqda.

MIB Namangan shahar bo‘limi boshlig‘ining o‘rinbosari Ahadjon Abduxalilovning ma’lum qilishicha, Namangan shahrida istiqomat qiluvchi Nasimjon Paxritdinov qirg‘izistonlik Alimardon degan shaxs bilan til biriktirib, qalbaki 19 500 AQSh dollarni haqiqiy 12 ming dollarga almashtirishga kelishadi. Qalbaki pullarga xaridor ham tayyor edi.

Jinoiy guruh Kosonsoy tumanida soxta pullarni haqiqiysiga almashtirayotgan chog‘ida huquqni muhofaza qiluvchi idoralar vakillari tomonidan ashyoviy dalillar bilan qo‘lga olindi.

Surishtiruvlar chog‘ida guruh oldin ham shunday ishga qo‘l urgani va 6800 qalbaki AQSh dollarini 4000 haqiqiy dollarga almashtirib, pul o‘tkazmalari orqali xorijga chiqarib yuborgani aniqlandi.

2021-yil 23-dekabr kuni MIB Namangan viloyat boshqarmasida soxta 19 500 dollar jurnalist va blogerlar ishtirokida yoqib yuborildi.

Boshqarma matbuot xizmatiga ko‘ra, Namanganda 2021-yilning shu kuniga qadar MIB tomonidan qalbaki valyuta bilan bog‘liq 4 ta hujjat ijrosi doirasida umumiy hisobda soxta 46 650 AQSh dollari yo‘q qilingan.