Yaponiya Termiz tumanidagi tibbiyot muassasalarining suv ta’minotini yaxshilashga yordam beradi

BMTning bolalar fondi (YuNISEF) Yaponiya hukumatining granti doirasida 433 ming dollarni Surxondaryo viloyatidagi birlamchi tibbiyot muassasalarini qo‘llab-quvvatlashga yo‘naltiradi. Bu haqda tashkilotning O‘zbekistondagi vakolatxonasi xabar berdi.

Dastur doirasida Surxondaryo viloyatining Termiz tumanidagi birlamchi tibbiyot-sanitariya muassasalarida suv, sanitariya va gigiyena (SSG) tizimini yaxshilash bo‘yicha maxsus tadbirlar amalga oshiriladi.

Suv quvurlarini o‘tkazish, suv tarkibini yumshatish va filtrlash qurilmalari va suv rezervuarlarini o‘rnatish, sanitariya inshootlarini qurish va ta’mirlash, elektr va issiq suv uchun quyosh panellari va chiqindilarni qayta ishlash inshootlarini qurish shular jumlasidan. Shu bilan birga, zamonaviy SSG infratuzilmasi doimiy ravishda ishlashini ta’minlash uchun uning ekspluatatsiyasi va texnik xizmat ko‘rsatish amalga oshiriladi.

YuNISEF loyihani 2022-yilning martidan 2023-yilning fevraligacha bo‘lgan davr mobaynida amalga oshiradi. Termiz tumanining 80 mingga yaqin aholisi yettita birlamchi sog‘liqni saqlash muassasalarida takomillashtirilgan SSG xizmatlaridan foydalanishlari hamda maishiy chiqindilarni utilizatsiya qilishning ishonchli tizimidan foydalanish imkoniyatiga ega bo‘lishlari kutilmoqda. Shuningdek, ular gigiyena bo‘yicha axborot materiallari bilan ta’minlanadi.

Avvalroq sog‘liqni saqlash vaziri Behzod Musayev SSV tizimidagi talabga javob bermaydigan barcha sanitariya-gigiyena xonalarini ta’mirdan chiqarish bo‘yicha ko‘rsatma bergandi.