Rustam Qobilov Samarqand viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — viloyat turizm va sport bosh boshqarmasi boshlig‘i lavozimiga tayinlandi. Bu haqda viloyat hokimligi matbuot xizmati xabar berdi.
Ma’lum qilinishicha, Samarqand viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — viloyat turizm va sport bosh boshqarmasi boshlig‘i Botirjon Nurullayev boshqa ishga o‘tishi munosabati bilan o‘z arizasiga asosan egallab turgan vazifasidan ozod etilgan.
Rustam Qobilov tayinlovga qadar O‘zbekiston prezidenti huzuridagi Davlat xizmatlarini rivojlantirish agentligi Samarqand viloyati hududiy filiali rahbari lavozimida faoliyat yuritib kelayotgandi. U bundan avval, 2018-yil aprel oyidan 2020-yilning sentabriga qadar viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari vazifasida ishlagan.
Shuningdek, viloyat hokimining o‘rinbosari — mahalla va oilani qo‘llab-quvvatlash boshqarmasi boshlig‘i Asqar Umarov ham boshqa ishga o‘tishi munosabati bilan o‘z arizasiga asosan egallab turgan vazifasidan ozod etilgan.
Ushbu lavozimga shu kunga qadar Samarqand viloyati Bandlik bosh boshqarmasi boshlig‘i lavozimida faoliyat olib borgan Isroil Jabborov tayinlangan.
Avvalroq Namangan viloyati hokimining o‘rinbosari Uychi tumaniga hokim bo‘lgani, Buxoroda bir nechta tuman hokimlari o‘zgargani, Oqdaryo tumaniga yangi hokim tayinlangani to‘g‘risida xabar berilgandi.
Izoh (0)