Shavkat Mirziyoyev 22-dekabr kuni Toshkent viloyati Olmaliq shahriga tashrif buyurib, hudud faollari, mahalla raislari va hokim yordamchilari bilan geologiya sohasi bo‘yicha suhbatlashdi. Bu haqda huquqshunos va bloger Xushnud Xudoyberdiyev o‘zining Telegram kanalida ma’lum qildi.
Qayd etilishicha, davlat rahbari Olmaliqda geologiya ishlariga katta urg‘u berilayotgani haqida ma’lumot bergan.
“Birinchi va ikkinchi misni qayta ishlab chiqaradigan korxonalarimiz bor edi. Biz hozir uchinchisini qilyapmiz. Oxirgi 25 yilda geologiyaga e’tibor berilmagani uchun shuncha yerosti boyliklarimiz borligini bilmagandik. Sizlar bilmaysizlar qanday boy odamsizlar, qanday yerosti boylikda yashayapsizlar, shuni ham tasavvur qilmayapsizlar. Hozirgi topgan (oltin) zaxiramiz 5 ming tonnadan ko‘proq. Bu juda katta, kelajagi bor korxona. Hozir topshiriq berdim, bir oy ichida birdaniga to‘rtinchisini ham, beshinchisini ham boshlaymiz”, — degan davlat rahbari.
Geologiya ishlari natijasida Olmaliqda 45 million tonna mis zaxirasi topilgan. Shavkat Mirziyoyev Toshkent viloyati hokimi Zoir Mirzayevga viloyatda Janubiy Koreya tadbirkorlari bilan birgalikda yarimo‘tkazgichlar ishlab chiqaruvchi zavod qurish topshirig‘ini bergan.
“Misni qayta ishlab, qo‘shimcha qiymat bo‘ladigan, tannarxi qimmat mahsulot ishlab chiqarishimiz kerak. O‘n marta emas, yuz marta o‘lchab, bir marta kesishimiz kerak. Katta mablag‘ ketadi, lekin biz kelajakka, yuz yildan keyinga zamin yaratyapmiz. Sizlar bir narsani bilishinglar kerak: Olmaliq bugungi Olmaliq bo‘lmaydi”, — deya qayd etgan prezident.
Eslatib o‘tamiz, Shavkat Mirziyoyev 22-dekabr kuni Toshkent viloyati Olmaliq shahriga tashrif buyurib, Olmaliq kon-metallurgiya kombinati (OKMK)da “Yoshlik 1” konini o‘zlashtirish investitsiya loyihasi bo‘yicha olib borilayotgan ishlar bilan tanishgandi. Qayd etilishicha, ushbu loyiha qiymati 5 milliard 122 million dollar bo‘lib, shundan 1 milliard 633 million dollari o‘z mablag‘lari hisobiga, 1 milliard 217,1 million dollari esa Tiklanish va taraqqiyot jamg‘armasi krediti va ustav fondi qo‘yilmasi hisobiga amalga oshiriladi.
Bundan tashqari, davlat rahbari Olmaliqdagi maktab o‘quvchilari bilan suhbatlashdi, Olmaliq shahrida faollar bilan bo‘lgan uchrashuvda Toshkent viloyatining sobiq hokimlari haqida fikr bildirdi.
Izoh (0)