Шавкат Мирзиёев 22 декабрь куни Тошкент вилояти Олмалиқ шаҳрига ташриф буюриб, ҳудуд фаоллари, маҳалла раислари ва ҳоким ёрдамчилари билан геология соҳаси бўйича суҳбатлашди. Бу ҳақда ҳуқуқшунос ва блогер Хушнуд Худойбердиев ўзининг Telegram каналида маълум қилди.
Қайд этилишича, давлат раҳбари Олмалиқда геология ишларига катта урғу берилаётгани ҳақида маълумот берган.
«Биринчи ва иккинчи мисни қайта ишлаб чиқарадиган корхоналаримиз бор эди. Биз ҳозир учинчисини қиляпмиз. Охирги 25 йилда геологияга эътибор берилмагани учун шунча ерости бойликларимиз борлигини билмагандик. Сизлар билмайсизлар қандай бой одамсизлар, қандай ерости бойликда яшаяпсизлар, шуни ҳам тасаввур қилмаяпсизлар. Ҳозирги топган (олтин) захирамиз 5 минг тоннадан кўпроқ. Бу жуда катта, келажаги бор корхона. Ҳозир топшириқ бердим, бир ой ичида бирданига тўртинчисини ҳам, бешинчисини ҳам бошлаймиз», — деган давлат раҳбари.
Геология ишлари натижасида Олмалиқда 45 миллион тонна мис захираси топилган. Шавкат Мирзиёев Тошкент вилояти ҳокими Зоир Мирзаевга вилоятда Жанубий Корея тадбиркорлари билан биргаликда яримўтказгичлар ишлаб чиқарувчи завод қуриш топшириғини берган.
«Мисни қайта ишлаб, қўшимча қиймат бўладиган, таннархи қиммат маҳсулот ишлаб чиқаришимиз керак. Ўн марта эмас, юз марта ўлчаб, бир марта кесишимиз керак. Катта маблағ кетади, лекин биз келажакка, юз йилдан кейинга замин яратяпмиз. Сизлар бир нарсани билишинглар керак: Олмалиқ бугунги Олмалиқ бўлмайди», — дея қайд этган президент.
Эслатиб ўтамиз, Шавкат Мирзиёев 22 декабрь куни Тошкент вилояти Олмалиқ шаҳрига ташриф буюриб, Олмалиқ кон-металлургия комбинати (ОКМК)да «Ёшлик 1» конини ўзлаштириш инвестиция лойиҳаси бўйича олиб борилаётган ишлар билан танишганди. Қайд этилишича, ушбу лойиҳа қиймати 5 миллиард 122 миллион доллар бўлиб, шундан 1 миллиард 633 миллион доллари ўз маблағлари ҳисобига, 1 миллиард 217,1 миллион доллари эса Тикланиш ва тараққиёт жамғармаси кредити ва устав фонди қўйилмаси ҳисобига амалга оширилади.
Бундан ташқари, давлат раҳбари Олмалиқдаги мактаб ўқувчилари билан суҳбатлашди, Олмалиқ шаҳрида фаоллар билан бўлган учрашувда Тошкент вилоятининг собиқ ҳокимлари ҳақида фикр билдирди.
Изоҳ (0)