Андижонда 500 мингга яқин аҳоли қандли диабет, юрак-қон томир, камқонлик ва бўғим касалликлари билан оғриши маълум қилинди

Андижонда 485 минг нафар аҳоли қандли диабет, юрак-қон томир, камқонлик ва бўғим касалликлари билан оғрийди. Бу ҳақда вилоят ҳокими Шуҳрат Абдураҳмонов вилоят халқига қилган мурожаатида маълум қилди, дея хабар берди «Дарё» мухбири.

Таъкидланишича, соғлиқни сақлаш тизимида қилинаётган амалий ишлар билан бир қаторда, аҳолининг ҳақли эътирозларига сабаб бўлаётган масалалар, жумладан, патронаж хизмати, кадрлар танқислиги, тиббиёт муассасаларининг замонавий тиббий анжомлар билан таъминланганлик даражаси каби муаммолар мавжуд. Вилоят ҳокимининг маълум қилишича, шу каби камчиликларни бартараф этиш, фуқароларнинг соғлиғини муҳофаза қилиш, аҳоли орасида тиббий хизматдан рози ёки норозилигини билиш мақсадида сўровнома ўтказилган.

«1 миллион 600 мингта сўровномани чиқариб аҳолига тарқатдик. Сўровнома ҳақиқатан тиббиёт соҳасида қилишимиз зарур бўлган ишларимиз кўплигини кўрсатди. Сабаби таҳлил якунларида сўровномада қатнашганларнинг 74 фоизи (744,5 минг нафар) кўрсатилаётган тиббий хизматни қониқарли баҳолаган бўлса, лекин 26 фоизи (269,5 минг нафар) қисман ва умуман тиббий хизматдан норозилигини билдирган. Респондентларнинг 80 фоизи оила шифокори ва патронаж ҳамшираларнинг ишини ижобий баҳолаган бўлса, 20 фоизи уларнинг ишидан норозилигини айтган. Шунингдек, аҳоли ўртасида юрак-қон томир (134 минг), қандли диабет (60 минг), камқонлик (224 минг) ва бўғим (67 минг) каби касалликлар кўп тарқалгани маълум бўлди.

Сўровномада 60 минг нафар ёки 5,4 фоиз аҳоли қандли диабет касаллиги билан оғриб туришини айтиб ўтган. Ваҳоланки, ҳозирда эндокринология диспансери назоратида 1 фоиз аҳоли туриши кўрсатилган. Бунинг сабаби бирламчи тизимда эндокрин касалликларни аниқлаш ва уни назоратга олиш етарли эмаслигини кўрсатади.

Қандли диабетдан азият чекаётган аҳоли туманлар кесимида таҳлил қилинганда Андижон туманида 9,1 фоиз, Хонобод шаҳрида 7,7 фоиз, Олтинкўл ва Пахтаобод туманларида 7,3 фоизни ташкил этган. Бу жуда ачинарли ҳолат», — дейди Шуҳрат Абдураҳмонов.

Маълум қилинишича, 2022 йилда бирламчи тиббиёт муассасаларида 85 та алоҳида ҳамширалик қабул пунктлари, 100 та хусусий тиббиёт муассасаси, Балиқчи, Шахрихон, Қўрғонтепа ва Пахтаобод туманларида 4 та туманлараро перинатал марказлар, шунингдек, Бўстон туманида туманлараро жарроҳлик травматология маркази ташкил этиш мўлжалланган.

Бундан ташқари, маҳаллий бюджет ҳисобидан Эндокринология диспансерига беморларнинг дори-дармон харажатлари учун қўшимча 2,5 миллиард сўм маблағ ажратиб, беморларни 100 фоиз бепул дори-дармон, аҳолининг хавфли гуруҳига мансуб 1 миллионга яқин ҳомиладор аёллар ва 14 ёшгача бўлган болаларни 2022 йил 1-ярим йиллигида 750 миллион сўмлик ёд препаратлари билан бепул таъминлаш режалаштирилган.