O‘zbekistonda yangi 50 ming va 100 ming so‘mlik kupyuralar muomalaga chiqarilishi kutilayotgani to‘g‘risida xabar berilgandi. 16-dekabr kuni Markaziy bank yangi ko‘rinishdagi nominal qiymati 50 ming so‘m va 100 ming so‘m bo‘lgan banknotalar dizaynini e’lon qilgan. Biroq yangi ko‘rinishdagi 50 ming so‘mlik kupyura dizaynida xatolik ketgani ma’lum bo‘ldi.
“Azon.uz” nashri 50 ming so‘mlik banknota dizaynida chalkashlik, xato ketib qolgani haqida yozgan. Ya’ni banknot namunasining old tomonida “Al-Hakim at-Termiziy” maqbarasi tasviri tushirilgan, ammo maqbara nomi “Abu Iso at-Termiziy” deb yozilgan. Markaziy bank esa holatga munosabat bildirib, haqiqatan ham namunadagi tasvir va uning nomlanishida texnik xatolik mavjudligini tan oldi.
“Mutaxassislar bilan qayta o‘rganish natijasida haqiqatan ham namunadagi tasvir va uning nomlanishida texnik xatolik mavjudligi ma’lum bo‘ldi. Shu sababli Markaziy bank yangi dizayndagi 50 ming so‘mlik banknotlar muomalaga chiqarilishidan oldin uning namunasida aniqlangan texnik xatolik bartaraf etilishini hamda maqbaraning nomi to‘g‘ri qayd etilishini ma’lum qiladi”, — deyiladi xabarda.
Markaziy bank banknotlar dizaynlariga befarq bo‘lmagan barchaga o‘z minnatdorchiligini bildirgan.
Eslatib o‘tamiz, O‘zbekistonda 2021-yilning 14-iyunidan boshlab nominal qiymati 2 000 so‘m va 20 000 so‘m bo‘lgan banknot ko‘rinishidagi yangi pul belgilari muomalaga chiqarilgandi. 2021-yilning 26-avgustidan boshlab esa O‘zbekistonda 5 ming va 10 ming so‘mlik banknotalar yangi ko‘rinishda muomalaga chiqarilishini boshlagan edi. O‘shanda Markaziy bank vakili 5 ming va 10 ming so‘mlik banknotalar yangi ko‘rinishda chiqarilishiga banknotlarni yagona tematikaga birlashtirish maqsadi ham sabab bo‘lganini aytib o‘tgandi.
Izoh (0)