Ijtimoiy tarmoqlarda Farg‘ona viloyatidagi tug‘ruqxonalarning birida shifokor va bemorning yaqinlari o‘rtasidagi tortishuv aks etgan video tarqaldi. Videoda to‘lg‘oq tutayotgan homilador ayolning eri yashash manzili boshqa hudud bo‘lgani uchun xotinini tug‘ruqxonaga qabul qilishmaganini, ma’lum miqdordagi pul so‘rashganini, videoga ola boshlaganidan keyingina vaziyat o‘zgarganini aytgan.
Biroq, videoda video muallifi aytgan holat emas, ayolning yaqinlari uni olib ketishga uringani ko‘ringan. Shifokor esa homilador ayolni olib qolishga harakat qilgan. Shu yerda tug‘dirish zarurligini, ayol boshqa joyga yetib borolmay qolishi mumkinligini aytgan.“Nega endi bunaqa qilyapsiz, nega avval qabul qilmayman dedingiz-da, endi videoga olayotganim uchun o‘zgarib qoldingiz? Yo‘q, biz endi olib ketamiz. Siz qabul qilmayman dedingiz, endi biz boshqa joyga olib boramiz. Tug‘maydi endi. Bir gap bo‘lsa, Siz javob berasiz. Hozir pul so‘rayotgandingiz-ku, qabul qilmayman degandingiz-ku. Men shu video bilan prezidentga chiqaman”, — deydi homilador ayolning eri. Tug‘ruqxona bosh shifokori ekani aytilgan ayol esa videoga olayotgan erkakni haqoratlab, bemorni olib ketishiga qarshilik ko‘rsatgan.
“Daryo” muxbirining aniqlik kiritishicha, videodagi holat joriy yilning 11-dekabr kuni Farg‘ona viloyat perinatal markazida kuzatilgan.
Dastlab, holat yuzasidan izoh olish maqsadida videodagi homilador ayol — Gulsanam Po‘latovaning turmush o‘rtog‘i Mirodil Po‘latov bilan bog‘landik.
“11-dekabr kuni kech soat 6-7 larda turmush o‘rtog‘im Gulsanam Po‘latovaning to‘lg‘og‘i tutib, biroz tobi qochib qoldi. O‘zimizning poliklinikadagi shifokorlar tug‘ruq vaqtini 2-yanvar kuniga belgilashgandi. Biz qo‘rqib ketib tez tibbiy yordamga telefon qildik. Tez tibbiy yordam turmush o‘rtog‘imni to‘g‘ri ‘Oybek’ tug‘ruqxonasiga olib bordi. Tug‘ruqxonaga borganimizda to‘lovlari borligini aytishdi. Men ‘bepul emasmi’ desam, ‘qayerda bepul joy bor, to‘lov qilmasangiz bemorni olib ketavering’, deyishdi. Unda menga qabul qilmaymiz, deb yozib beringlar desam, ‘Sizga kim yozib beradi’, deyishdi. Unda o‘zim videoga yozib olaman deb telefonimni olishim bilan haqoratlab ketishdi. Telefonimni olib qo‘yish uchun yugurdi, ololmaganidan keyin muloyim gapira boshladi. Eshikni qulflab olib, o‘zim shu yerda tug‘diramanga o‘tib oldi va xotinimni ichkariga qarab sudrashga tushdi. ‘Shu yerda tug‘asan’, deb. Shuncha qilgan ishlaridan keyin qanday qilib bu ayolga ishonardim. Bir narsa qilib eshikni ochib, turmush o‘rtog‘imni Vodilga (Farg‘ona tumani markazi) olib ketdim. 30-35 kilometr joyga o‘zimning Damas mashinamda olib bordim. Vodildagi tug‘ruqxona shifokorlariga rahmat. Darrov besh-oltita xodimi chiqib, turmush o‘rtog‘imni qabul qilib oldi. Yaxshi xizmat ko‘rsatishdi, minnatdorman”, — deydi Mirodil Po‘latov.
“Daryo” so‘roviga ko‘ra, viloyat sog‘liqni saqlash boshqarmasi holat yuzasidan qo‘shimcha ma’lumot berdi.
Ma’lum qilinishicha, 11-dekabr kuni soat 17:50 larda Farg‘ona tumani “Cheksho‘ra” mahalla fuqarolar yig‘inida yashovchi 1994-yilda tug‘ilgan homilador ayol Gulsanam Po‘latova oila a’zolari hamrohligida shaxsiy mashinada viloyat perinatal markaziga kelgan va hech qanday yo‘llanmasiz shifokorlarga murojaat qilgan.
Qabul bo‘limi navbatchi akusher-ginekologi D.Mamasidiqova homilador ayolga akusherlik ko‘ruvi o‘tkazib, ayolda to‘lg‘oq dardi borligini ma’lum qilgan. Shuningdek, tug‘ruqxonada qolish uchun koronavirusga qarshi test topshirishi kerakligini, bu tahlil to‘lov asosida amalga oshirilishini tushuntirgan.
“Sog‘liqni saqlash vazirligining 151-sonli buyrug‘iga ko‘ra, homilador va tug‘uvchi ayollarga tibbiy xizmat ko‘rsatish hududiylashtirish tamoyillariga asoslanadi. Fiziologik tug‘ruqlar birinchi darajali tug‘ruq bo‘limlarida amalga oshiriladi. Viloyat perinatal markazi esa uchinchi darajali tug‘ruq muassasasi hisoblanib, u yerda homiladorligi asoratlar bilan o‘tayotgan, ona va bola salomatligiga ta’sir qiladigan xavflar mavjud bo‘lgan va operatsiya o‘tkazilishi shart bo‘lgan homilador ayollar qabul qilinadi.
Homilador ayolning turmush o‘rtog‘i buyruqlarning asl mohiyatini tushunishni xohlamagan. Perinatal markaz mutaxassislari Gulsanam Po‘latovani tug‘ruqxonada olib qolishga qaror qilganligiga qaramasdan, turmush o‘rtog‘i uni majburlab, olib ketishga uringan. Qayd etilishicha, Gulsanam Po‘latova Farg‘ona tumani tibbiyot birlashmasiga qarashli tug‘ruq bo‘limiga 40 daqiqadan so‘ng yetib borib, soat 20:35 da qiz farzand ko‘rgan. Tug‘ruq asoratsiz kechgan, ona va bolaning salomatligi yaxshi. Tug‘ruq jarayonini viloyat perinatal markazining bosh shifokori telefon orqali nazorat qilib turgan”, — deyiladi boshqarma axborotida.
Gulsanam Po‘latovaning turmush o‘rtog‘i va qaynonasi ularni viloyat perinatal markaziga tez tibbiy yordam mashinasi olib borganini aytdi. Viloyat sog‘liqni saqlash boshqarmasi esa homilador ayol oila a’zolari hamrohligida shaxsiy mashinasida kelganini ma’lum qildi. O‘sha kuni navbatchilikda turgan perinatal markazi qorovuli Samadillo Yusupov sog‘liqni saqlash boshqarmasining ma’lumotini tasdiqladi. Uning aytishicha, Gulsanam Po‘latova va uning yaqinlari tug‘ruqxonaga shaxsiy Damas mashinasida kelishgan va yana xuddi shu avtomashinada qaytib ketishgan.Qayd etilishicha, 16-dekabr kuni ijtimoiy tarmoqlarda tarqalgan video yuzasidan viloyat sog‘liqni saqlash boshqarmasida yig‘ilish o‘tkazilgan. Yig‘ilish davomida viloyat perinatal markazi bosh shifokorining deontologiya (shifokor muomalasi) qoidalarini buzganligi aniqlangan. Bosh shifokordan tushuntirish xati olinib, intizomiy chora ko‘rish maqsadida Sog‘liqni saqlash vazirligiga yuborilgan.
Izoh (0)