Toshkent metropolitenida yana poyezd eshigi ochiq holatda harakatlandi. Holatga rasmiy izoh berildi

Ijtimoiy tarmoqlarda eshigi yarim ochiq holatda “Paxtakor” metro bekatiga kirib kelayotgan poyezd videosi tarqaldi. Holat yuzasidan Toshkent metropoliteni izoh berdi.

Qayd etilishicha, 15-dekabr sanasida yo‘lovchilar qatnovi tig‘iz bo‘lgan vaqtda “Chilonzor” yo‘lining “Olmazor”—“Buyuk Ipak yo‘li” yo‘nalishlarida yuz bergan.

Vaziyatga aniqlik kiritilishicha, yo‘lovchilar tomonidan eshikka suyanish natijasida eshikka me’yoridan ortiq yuklama tushishi sababli o‘sha vaqtda vagon eshiklarining blokiratori nosoz ahvolga kelgan.

Mashinist ushbu holatdan xabar topgan, ammo tunnel ichida yo‘lovchilarni ortiqcha vahimaga solmaslik uchun “Xalqlar do‘stligi” metro bekatidan “Paxtakor” metro bekatiga yetib kelgan. Aynan shu bekatda vagon eshigidagi muammo bartaraf etilgan. Hech qanday baxtsiz hodisa ro‘y bermagan, jabrlanganlar yo‘q.

“Shu o‘rinda, metro yo‘lovchilaridan, vagon eshiklariga suyanmaslik, eshiklar yopilish chog‘ida vagon ichiga va tashqarisiga tomon harakatlanmasliklarini so‘raymiz”, — deyiladi metropoliten xabarida.

Qayd etish joizki, mart oyidan buyon Toshkent metropoliteni bilan bog‘liq shu kabi voqealar tez-tez yuz bermoqda. Xususan, 18-mart kuni “Olmazor” (Chilonzor yo‘li) va “Bekat-1” (Sergeli yo‘li) orasidagi tunnelda ikki poyezd “to‘qnashgandi”.

9-aprel kuni ijtimoiy tarmoqlarda poyezdning ochiq eshiklar bilan harakati tushirilgan video tarqaldi. Shu bilan birga, metropolitendagi yerosti va yerusti poyezd harakatlarining bir nechta boshqa videolari ham ijtimoiy tarmoqlarda ko‘p bora muhokama qilindi. 28-aprel kuni esa tunnelda to‘xtab qolgan poyezd haqidagi video tarqaldi, unda yo‘lovchilar relslar orqali harakatlanib, bekatga yetib olgani tasvirlangan. 13-may kuni “Amir Temur xiyoboni” bekatida barcha yo‘lovchilar tushirib yuborilgandi. 20-iyun kuni “Olmazor” bekatida ham xuddi shu kabi holat yuz bergan, 28-avgust kuni Toshkent metrosi poyezdida kuzatilgan nosozlik sabab yo‘lovchilar “Toshkent” bekatida tushirib qoldirilgan, 20-sentabr kuni esa Toshkentda metro poyezdi “G‘ofur G‘ulom” bekatida to‘xtab qolgandi.

22-sentabrda Xalqlar do‘stligi” bekatida poyezd vagonlaridan birining eshigida nosozlik kuzatilgan va yo‘lovchilar tushirib yuborilgan, 27-sentabr kuni ham poyezdda kuzatilgan nosozlik sabab yo‘lovchilar bekatda tushirib qoldirilgan.