Adliya vaziri Ruslanbek Davletov 16-dekabr kuni O‘zbekiston prokuratura organlari tashkil etilganining 30 yilligiga bag‘ishlangan “O‘zbekiston prokuraturasi: kecha, bugun va ertaga” mavzusida xalqaro ilmiy-amaliy konferensiyasida ishtirok etdi. Bu haqda vazirlik matbuot xizmati xabar berdi.
O‘z nutqida adliya vaziri jamiyatda qonun ustuvorligini ta’minlash, qonuniylikni mustahkamlash, fuqarolarning huquq va erkinliklarini ishonchli himoya qilishda prokuratura organlarining roliga to‘xtalib o‘tgan.
Ta’kidlanishicha, oxirgi 3 yilda prokuratura organlari tomonidan qonuniylikni ta’minlash maqsadida jami 540 mingdan ortiq prokuror hujjatlari qo‘llanilgan. Shuningdek, so‘nggi 5 yil davomida O‘zbekistonda korrupsion qilmishni sodir etib, jinoiy javobgarlikka tortilgan mansabdor shaxslar soni 14 mingdan oshgan. Shulardan 160 nafardan ortig‘i respublika miqyosidagi, 1 270 nafardan ortig‘i viloyat miqyosidagi hamda 13 ming nafardan ortig‘i tuman miqyosidagi mansabdor shaxslar ekanligi prokuratura organlarining korrupsiyaga toqatsizlik borasidagi faoliyat ko‘lami qay darajada ekanligini ko‘rsatadi.
Ma’lum qilinishicha, 2021-yilning o‘tgan 6 oyida 140 mingdan ortiq fuqaroning murojaati hal etilib, 23 mingga yaqin shaxsning buzilgan huquqlari tiklangan.
“Shu bilan birga, tan olish kerak, faqatgina prokuraturaning bir o‘zi qonuniylikni to‘liq ta’minlay olmaydi. Bu jarayonlarda boshqa organlar ham, jamoatchilik ham faol ishtirok etishi kerak. Nazorat-tekshiruv sohasi hali hamon islohotga muhtoj. Bu o‘rinda biz bugungi kunda respublikadagi turli davlat boshqaruv organlari tarkibidagi 50 dan ortiq nazorat-tekshiruv idoralarini nazarda tutyapmiz. Ularning 10 dan ortig‘i o‘zlari tekshirishi kerak bo‘lgan vazirlik va idoralarga bo‘ysunadi. Bir idorada ham tekshiruvchi, ham tekshiriluvchi bo‘ladigan bo‘lsa, bu yerda manfaatlar to‘qnashuvi ortidan qandaydir qonun buzilish holatlari kelib chiqadi”, — deydi Davletov.
Shuningdek, u adliya organlari va prokuratura o‘rtasidagi hamkorlik ancha mustahkamlanganligi, bugungi kunda Jinoyat, Jinoyat-protsessual hamda Jinoyat-ijroiya kodekslari ustida birgalikda ish olib borilayotganini ham ta’kidlab o‘tdi.
Avvalroq Bosh prokuratura boshqarma boshlig‘ining yana bir o‘rinbosari pora bilan qo‘lga tushgani, O‘zbekistonda davlat xizmatchilari har qanday turdagi mukofot va sovg‘a olishi taqiqlanishi kutilayotgani, O‘zbekistonda Korrupsiyaga qarshi kurashish agentligining vakolatlari kengaytirilgani to‘g‘risida xabar berilgandi.
Izoh (0)