Oliy Majlis Senatining 16-dekabr kungi yalpi majlisida poytaxt hokimi Jahongir Ortiqxo‘jayev Toshkentda daraxtlarning kesilishiga qarshi olib borilayotgan ishlar yuzasidan ma’lumot berdi.
Ta’kidlanishicha, Toshkent shahrida 1,2 millionga yaqin daraxt xatlovdan o‘tkazilgan, lekin ularning 20 foizi ham Yagona elektron ma’lumotlar bazasiga kiritilmagan. Moratoriyga qaramasdan, daraxtlarni kesish holatlari hali ham davom etmoqda. 2021-yilning yanvar—noyabr oylarida 33 639 ta daraxtni kesish uchun Ekoqo‘mitaga 2479 ta ariza kelib tushgan. 1483 ta arizaga rad javobi berilib, 22 145 ta daraxt saqlab qolingan.
Senatorlar Toshkent hokimidan ekologiya yomonlashuvi aholining haqli e’tiroziga, ijtimoiy tarmoqlarda keskin muhokamalarga sabab bo‘layotgan masalalar bo‘yicha kelgusidagi rejalari va ularni bartaraf etish bo‘yicha olib borilayotgan ishlari to‘g‘risida ma’lumot so‘ragan.
“Ahamiyat bersangiz, oxirgi yillarda umuman daraxtlarning aniq egasi bo‘lmagan — na Ekologiya qo‘mitasi, na hokimlikka qarashli bo‘lgan. Raqamlashtirilmagan, kim qayerga xohlasa, ekish kerak bo‘lmagan joylarga ham daraxt ekilgan…
Toshkent shahar hokimligi qoshida Raqamlashtirish markazi tashkil qilindi. Hozirda har bitta daraxtni ushbu markazda aniq hisobga olib, boshqaruvini yo‘lga qo‘yyapmiz. Haqiqatan kesilib ketgan joylar bor. Bizning — shahar hokimligining to‘g‘ridan to‘g‘ri yordam bera olmagan, aybdor bo‘lgan joylari ham bor, men buni tan olaman. Qurilish maydonlarida kesilib ketgan, nobud bo‘lgan daraxtlar ham borligini tan olaman. Lekin oxirgi paytda suvning yer sathidan qochishi qurilishlarga aslo bog‘liq emas, chunki dunyoda ekologiyaning o‘zgarib borishi faqat Toshkentda emas, butun dunyoda suvlarning yer sathidan pasayishiga olib kelyapti. O‘ylaymanki, ekologlarimiz buning ustida ham ishlashadi.
Umuman, bu borada biz 200 varaqqa yaqin loyiha ishlab chiqqanmiz, unda barcha qilinishi kerak bo‘lgan ishlar ishlab chiqilgan”, — deydi poytaxt hokimi.
Avvalroq Jahongir Ortiqxo‘jayev G‘afur G‘ulom bog‘ini 49 yilga Singapur kompaniyasiga ijaraga berish masalasi qayta ko‘rib chiqilishini aytgandi.
Izoh (0)