Ўзбекистонда сўнгги икки ой ичида иссиқлик тизимида 27 та авария содир бўлган. Бу ҳақда АОКАда ўтказилган брифингда Уй-жой коммунал хизмат кўрсатиш вазирлиги вазир ўринбосари Қурбон Турсунов маълум қилди.
Турсуновнинг сўзларига кўра, ҳозирги кунда барча вилоятларда «Вилоят штаби» ташкил этилган бўлиб, соҳага алоқадор корхона ва ташкилотларнинг масъул ходимлари бириктирилган. Мавсумда иссиқлик таъминоти тизимида юзага келиши мумкин бўлган авария ҳолатларини зудлик билан бартараф этиш мақсадида барча ҳудудларда 24 соатлик диспетчерлик хизмати йўлга қўйилган.
Шунингдек, жорий иситиш мавсуми 15 октябрдан бошланган бўлиб, тизимда сўнгги 2 ой давомида жами 27 та авария содир бўлган. Булардан 7 таси кўп қаватли уйларнинг ички тизимида, 7 таси иссиқлик тармоқларида, 3 та табиий газ таъминоти босимининг пасайиши ва 10 та электр энергияси таъминоти узилиши натижасида юзага келган.
Шунингдек, Тошкент шаҳридаги «Ц-4» қозонхонасидаги узилишдан бошқа сезиларли даражадаги авария ҳолатлари содир бўлмаган. Ҳозирда барча қозонхоналар бир маромда ишламоқда.
Бугунги кунда 505 та қозонхона ва 3 704 километр иссиқлик тармоқлари орқали, 614 577 та хонадондан иборат 13 366 та кўп қаватли уйлар ва 1 885 та ижтимоий соҳа объектлари иссиқлик энергияси билан таъминланмоқда.
Таъкидланишича, иссиқлик таъминоти корхоналари томонидан бир кунда 3 миллиард сўмлик иссиқлик энергияси етказиб берилмоқда ва бир кунлик тушум 1,4 миллиард сўмни (аҳолига 1 метр квадрат иситиладиган майдон учун ўртача 150 сўм) ташкил этяпти.
Аввалроқ Ўзбекистонда иссиқлик тармоқларининг 60 фоизи таъмирталаб аҳволда экани маълум қилингани, Тошкентда иситиш тизимига кечикиб уланган хонадонлар қайта ҳисоб-китоб қилингани тўғрисида хабар берилганди.
Изоҳ (0)