Rasman: Tashkilotchilar xatosi sabab Chempionlar Ligasi 1/8 finaliga qaytadan qur’a tashlanadi

Yevropa Chempionlar Ligasi 1/8 final bosqichiga qaytadan qur’a tashlash marosimi o‘tkaziladi. Bu haqida UEFA matbuot xizmati ma’lum qildi.

Biroz avval bo‘lib o‘tgan qur’a tashlash marosimi bekor qilindi. Ma’lum bo‘lishicha, “Atletiko” jamoasi qur’a tashlash marosimidagi xato sabab UEFA ga shikoyat qilgan.

Dastlabki qur’a jarayonida texnik xato sabab “Manchester Yunayted” nomi “Vilyarreal”ning raqibi aniqlanayotgan savatchaga tushib qolgan. Buning ketidan yana uchta holatda qoida buzilgan: “Atletiko”ning raqibi aniqlanayotganda savatga “Liverpul”ning qo‘shilishi; “Manchester Yunayted”ning “Atletiko”ning raqibi aniqlanayotgan vaqtda savatda yo‘qligi; “Liverpul”ning “Vilyarreal”ning raqibi aniqlangan savatda yo‘qligi.

Shu tariqa UEFA dastlabki qur’a marosimini bekor qildi va uning qaytadan o‘tkazilishini ma’lum qildi.

1/8 finalga takroriy qur’a tashlash marosimi 13-dekabr kuni Toshkent vaqti bilan 19:00 da boshlanadi.