Дунё ва ўзбек спортига оид 14 декабрнинг энг муҳим хабарлари дайжести билан танишинг.
Ўзбекистон
Ўзбекистон футзал терма жамоаси Қозоғистонга ютқазиб қўйдиФутзал бўйича Ўзбекистон миллий терма жамоаси 14 декабрь куни Қозоғистон терма жамоаси билан ўртоқлик ўйини ўтказди. Унда ўзбекистонлик футзалчилар 3:1 ҳисобида имкониятни бой бериб қўйди.
Ўртоқлик ўйини
Қозоғистон — Ўзбекистон 3:1
Голлар: 1:0 – 22 Арнольд Кнауб, 2:0 – 23 Дуглас Жуниор, 2:1 – 37 Илҳом Ҳамроев, 3:1 – 39 Игита.Мазкур терма жамоалар ўртасидаги иккинчи ўртоқлик ўйини 15 декабрь куни бўлиб ўтади.
Париж—2024 Олимпиадаси очилиш маросими очиқ осмон остида бўлиб ўтади
2024 йилда Франциянинг Париж шаҳрида бўлиб ўтадиган ёзги Олимпия ўйинларининг очилиш маросими Сена дарёси бўйида ўтказилади. Бу ҳақда МОҚ хабар қилмоқда.
Режага кўра, маросимда иштирокчи давлатлар махсус қайиқларда дарё бўйлаб белгиланган 6 километрлик масофани сузиб ўтади. Парад йўналиши дарё бўйлаб шаҳарнинг кўзга кўринган объектлари олдидан ўтади. Ҳисоб-китобларга кўра, бундай маросимни 600 минг томошабин бевосита соҳил бўйларида кузатиб бориши мумкин. Ушбу лойиҳа амалга ошса, Олимпия ўйинлари тарихида дарё бўйлаб ўтган дастлабки очилиш маросими бўлади.
Ла Лига 5 йиллик трансляция ҳуқуқини 4,95 млрд еврога сотди
Movistar ва DAZN платформалари Ла Лига 2022/23—2026/27 йилги мавсумлари трансляция ҳуқуқини сотиб олди. Келишув 4 миллиард 950 миллион еврога баҳоланган.
Икки платформа ўйинларни узатиш ҳуқуқини тенг бўлишади: ҳар бири битта турда бештадан ўйинни намойиш қилади.
Чемпионлар Лигаси 1/8 финал ўйинлари тақвими эълон қилинди
15 февраль ва 9 март
- «Спортинг» (Португалия) — «Манчестер Сити» (Англия);
- «ПСЖ» (Франция) — «Реал» (Испания);
- «Зальцбург» (Австрия) — «Бавария» (Германия);
- «Интер» (Италия) — «Ливерпуль» (Англия);
- «Челси» (Англия) — «Лилл» (Франция);
- «Вильярреал» (Испания) — «Ювентус» (Италия);
- «Бенфика» (Португалия) — «Аякс» (Нидерландия);
- «Атлетико» (Испания) — «Манчестер Юнайтед» (Англия).
UFC собиқ чемпиони ва Eagle FC промоушени хўжайини Ҳабиб Нурмагомедов футбол агентлигини очди.
«Биз футбол соҳасида ҳам ривожланамиз. Кларенс Зеедорф билан бирга Россияда футбол мактаби очишни режалаштиряпмиз. Eagles sports management футбол клубларига консалтинг хизматлар кўрсатади.
Бизда ҳали иш кетмоқда, ёшларни болаликдан футболга тайёрлаймиз. 15–16 ёшингдаёқ кучли жамоада ўйнамасанг, ҳеч нарса чиқмайди. Уларга тўғри йўл кўрсатамиз, бошқа лигаларга юборамиз: БАА, Саудия Арабистони, шунингдек, Европа миллий лигаларига», — дейди Ҳабиб.
АПЛ мавсумни тўхтатиши мумкин
Sky Sports маълумотларига кўра, бир ҳафта ичида Премьер Лигада коронавирус билан боғлиқ 42 та ҳолат қайд этилди. Бу лиганинг антирекорди ҳисобланади. 6—12 декабрь кунлари 3805 та тест намуналари олинган. Ўтган ҳафтада 12 киши вирус аниқланганди.
Daily Mail’нинг қўшимча қилишича, Англияда жорий мавсумни тўхтатиш муҳокама қилинмоқда. «Тоттенҳэм», «Манчестер Юнайтед» ва «Астон Вилла» жамоаларида коронавирус ўчоғи аниқланган.
Аввалроқ АПЛ 17-тури доирасидаги «Брентфорд» — «Манчестер Юнайтед» учрашуви манкунианлар жамоасидаги касалланишлар сабаб қолдирилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)