«Аҳолиси кўп шаҳарлардаги 10 мингга яқин кўп қаватли уйларнинг нотурар объект сифатида 10 фоизидан ҳам фойдаланилмаяпти» – Шавкат Мирзиёев

Президент Шавкат Мирзиёев бошчилигида ўтказилаётган видеоселектор йиғилишида хизматлар соҳасини ривожлантириш учун ҳар бир туман ва шаҳар кесимида ишлаб чиқиладиган алоҳида дастурнинг иккинчи йўналишига кўра 29 та ўрта ва йирик шаҳарлар ҳамда аҳолиси 300 мингдан юқори 6 та туманда замонавий бозор хизматлари ривожлантирилиши айтилди.

Булар: Нукус, Андижон, Хонобод, Бухоро, Когон, Жиззах, Қарши, Шаҳрисабз, Навоий, Зарафшон, Ғозғон, Каттақўрғон, Термиз, Гулистон, Ширин, Янгиер, Нурафшон, Бекобод, Оҳангарон, Олмалиқ, Ангрен, Чирчиқ, Янгийўл, Қувасой, Фарғона, Қўқон, Марғилон, Урганч, Хива шаҳарлари ҳамда Асака, Шаҳрихон, Ғиждувон, Денов, Ургут, Паст Дарғом туманлари.

Энг аввало, аҳолиси кўп шаҳар ва туманларда хизматлар кўламини кенгайтириш учун энг долзарб масала – бу жой ажратиш эканлиги, лекин мазкур шаҳарларда 10 мингга яқин кўп қаватли уйлар мавжуд бўлиб, нотурар объект сифатида ушбу уйларнинг 10 фоизидан ҳам фойдаланилмаётгани қайд этилди.

Аҳолига хизмат кўрсатиш учун энг қулай жой – кўп қаватли уйларнинг биринчи қавати ҳисобланиши, аммо шаҳарларда кўп қаватли уйлар ертўлалари ҳам деярли бўш тургани, сабаби шу кунгача қурилган кўп қаватли уйларнинг ертўлалари одамлар ишлаши учун мўлжалланмагани айтилди.

Масъулларга бир ой муддатда янги қуриладиган кўп қаватли уйлар ертўласида хизмат кўрсатиш имкониятларини яратиш бўйича қурилиш нормаларига ўзгартириш киритиш топшириғи берилди. Шунингдек, кўп қаватли уйлардаги хонадонларни нотурар объектга айлантиришни соддалаштириш бўйича ҳукуматга қарор лойиҳасини киритиш бўйича вазифа белгиланди. Бунда кераксиз бюрократияни олиб ташлаб, ёнғин хавфсизлиги ва санитария бўйича аниқ талабларни белгиланади.