Buyuk Britaniyada koronavirusning navbatdagi to‘lqini tufayli hukumat yangi cheklovlar e’lon qilishi mumkin. 11-dekabr ma’lumotlari bo‘yicha 633 kishi koronavirusning yangi “omikron” shtammi bilan kasallangan, 10-dekabr kuni 58 mingdan ortiq odamning koronavirusga topshirgan testi ijobiy chiqqan. Guardian nashrining xabar berishicha, kasallanishlar soni ma’lum chegaradan oshadigan bo‘lsa, hukumat 18-dekabr kuni yangi cheklovchi choralar e’lon qilishni rejalashtirmoqda. Ular qatoriga bemorlar bilan kontaktda bo‘lganlarni karantinda uzoqroq saqlash, yopiq joylarda, jumladan, pablar va restoranlarda majburiy niqob taqish va ijtimoiy aloqalarni cheklash kabilar kiradi.
Yangi to‘lqinning boshlanishi hamda antikovid choralarining ehtimoliy kuchaytirilishi mamlakatda kechayotgan siyosiy mojaro bilan bir vaqtga to‘g‘ri keldi. Mojaro markazida esa bosh vazir Boris Jonson turibdi, deb yozadi Meduza.
Ommaviy axborot vositalari bir yil oldin — mamlakatda qat’iy cheklovlar hukm surayotgan vaqtda Jonson hukumatining a’zolari uning Dauning-stritdagi qarorgohida ziyofat uyushtirganidan xabar topdi. Endi esa, 8-dekabr kuni Jonson yangi cheklovlar haqida e’lon qilganida, uning ma’naviy obro‘siga putur yetdi, deb yozadi OAV. Mojaro tafsilotlari quyida bayon qilingan.
30-noyabr kuni Daily Mirror gazetasining yozishicha, 2020-yilning 18-dekabrida Dauning-stritdagi 10-uyda joylashgan bosh vazir qarorgohida 40—50 kishi ishtirokida Rojdestvo bayrami bo‘lib o‘tgan. O‘sha paytda Londonda ikki kunlik qat’y lokdaun joriy etilgan va yopiq binolarda uchrashuv o‘tkazish butunlay taqiqlangan edi. Gazeta da’vo qilgan ziyofatning ertasi kuni matbuot anjumanida Jonson lokdaunning kuchaytirilishi Rojdestvo ta’tiliga to‘g‘ri kelgani sababli bayram nishonlanmasligini e’lon qilgandi. Daily Mirror maqolasida aytilishicha, bosh vazir matbuot xizmatining apparati ziyofat davomida hech qanday qoida buzilmaganini bildirgan.
Keyingi bir necha kun davomida matbuot xizmati va Vazirlar Mahkamasi a’zolari, shu jumladan, Boris Jonsonning o‘zi ham o‘sha paytda amaldagi qoidalarni buzadigan biror ziyofat bo‘lganini inkor etdi, OAVdagi maqolalar esa “o‘tgan yilgi voqealar haqida mish-mish” deb ataldi. Skotland-Yard 2020-yil dekabr oyida “hukumat binosida cheklov choralari buzilgani” haqida ko‘plab shikoyatlar kelib tushganini, ammo o‘tmishdagi voqealar ustida tekshiruv o‘tkazish rejalashtirilmaganini ma’lum qildi.
7-dekabr kuni ITV bosh vazir qarorgohi matbuot markazida o‘tkazilgan brifing repetitsiyasidan olingan videoni e’lon qildi, unda Boris Jonsonning maslahatchilari, jumladan, uning matbuot kotibi Allegra Stretton 2020-yilgi ziyofat haqida jurnalistlarning noqulay savollariga qanday javob berish kerakligi haqida bir-biriga hazil qilgan. Videoda Stretton kulib hayron bo‘ladi: “Qanday javob berish kerak?” Keyin u bu umuman ziyofat emasdi, balki ish yuzasidan vino va pishloq bilan o‘tkazilgan uchrashuv edi, lekin ijtimoiy masofasiz o‘tgan, deydi.
Ertasi kuni, 8-dekabr kuni Vazirlar Mahkamasining barcha vazirlari jurnalistlar bilan intervyularini bekor qildi. Studiyadagi boshlovchilar voqealarni mehmonlarga arjatilgan bo‘sh stullar bilan sharhladi. Kechga yaqin Allegra Stretton ko‘zlarida yosh bilan iste’foga chiqdi va avvalroq tarqalgan videodagi nomaqbul hazillar uchun uzr so‘radi. Parlament sessiyasida Boris Jonson ham kechirim so‘rashga majbur bo‘ldi — lekin u bazm uchun emas (u ziyofatni hanuz tan olmagan), balki ommaviy axborot vositalarida tarqalgan video uchun.
9-dekabr kuni ma’lum bo‘lishicha, parlament tekshiruvi nafaqat 2020-yil 18-dekabrdagi Dauning-strit ziyofatiga, balki koronavirus qoidalarini buzgan yana ikkita bayram tadbiriga ham tegishli — biri shu binoda noyabrda, ikkinchisi Sog‘liqni saqlash vazirligida 2020-yil dekabrda o‘tkazilgan.
10-dekabr kuni OAVda xabar qilinishicha, “vino va o‘yinlar bilan” o‘tkazilgan 18-dekabr kungi ziyofatda bosh vazirning matbuot xizmati rahbari o‘rinbosari Jek Doyl nafaqat ishtirok etgan, balki tabrik nutqi so‘zlagan va mukofotlar topshirilgan. The Times esa ziyofat kutilmaganda tashkillashtirilmagani, balki unga bir necha hafta oldindan tayyorgarlik ko‘rilgani haqida yozdi. Jonsonning o‘zi tadbirda bo‘lmagan, ammo uning o‘tgan yili kelishmovchiliklar tufayli iste’foga chiqqan sobiq maslahatchisi Dominik Kammingsning ishontirib aytishicha, bosh vazir ham Rojdestvo bayramini nishonlashda ishtirok etgan.
Mojaro fonida Boris Jonsonning reytingi, YouGov sotsiologik xizmati ma’lumotlariga ko‘ra, karyerasi boshidan beri eng past darajaga tushib ketdi (29 foiz), antireyting rekord darajadagi 59 ballni tashkil etdi. OAVda odamlarning achchiq e’tirozlari tarqalmoqda. Xususan, ular kasalxonalarda koviddan o‘lib ketgan yaqinlarini so‘nggi manzilga kuzata olmagan paytda, Boris Jonsonning qo‘l ostidagilar hamma uchun belgilangan taqiqlarni chetlab o‘tib, ziyofat qilganidan g‘azabda.
“Millionlab britaniyaliklar o‘z rejalaridan voz kechib, Rojdestvoni yolg‘iz o‘tkazishga majbur bo‘lgan, bayramni nishonlay olmagan yoki kasalxonada vafot etayotgan yaqinlari bilan xayrlasha olmagan bir paytda, bosh vazir Dauning-stritdagi 10-uyda spirtli ichimliklar ichishga ruxsat berib, o‘z qoidalarini buzdi. Ular qoidalarni buzdi. Yolg‘on gapirdi. Endi esa sizning ustingizdan kulmoqda”, — deyiladi Britaniya liberal-partiyasining Twitter’dagi sahifasida.
Korrupsiyada ayblanib iste’foga chiqqan Konservativ partiya a’zosi Ouen Pattersonning parlamentdagi o‘rniga da’vogarlik qilayotgan liberal-demokratlar Boris Jonsonni faol ayblamoqda. Partiyadagi safdoshlari ham bosh vazirga allaqachon ochiqchasiga qarshi chiqa boshlagan. OAV Jonson bosh vazirlikka kirishganidan beri unga nisbatan eng yirik ichki muxolifat boshlangani haqida xabar bermoqda. Faqat uning o‘rniga aniq bir nomzodning yo‘qligi Jonsonni partiyaning ishonchsizlik votumidan qutqarib turibdi, deb yozadi Bloomberg.
Izoh (0)