Shavkat Mirziyoyevning “Iqtisodiyot tarmoqlari uchun muhandis kadrlarni tayyorlash tizimini innovatsiya va raqamlashtirish asosida tubdan takomillashtirish chora-tadbirlari to‘g‘risida” qarori imzolandi.
Prezident qaroriga asosan Toshkent irrigatsiya va qishloq xo‘jaligini mexanizatsiyalash muhandislari instituti “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti deb qayta nomlandi.
Qarorga muvofiq universitet faoliyatini muvofiqlashtirish bo‘yicha boshqaruv kengashi tashkil etildi va universitetning moliyaviy hamda boshqa strategik masalalarini hal qilish vakolati mazkur kengashga berildi.
Boshqaruv kengashiga bosh vazir o‘rinbosari — investitsiyalar va tashqi savdo vaziri Sardor Umurzoqov rahbarlik qiladi.
Shuningdek, universitetda Transformatsiya ofisi ham ta’sis etilmoqda.
Transformatsiya ofisi universitetni transformatsiya qilish va kompleks rivojlantirish dasturini amalga oshirish hamda 2025-yilga qadar xalqaro tan olingan tashkilotlarning oliy ta’lim muassasalari reytingida birinchi 1000 talik ro‘yxatga kiritish kabi masalalar uchun mas’ul bo‘ladi.
Shu bilan birga, universitetga 2022/2023-o‘quv yilidan boshlab akademik hamda tashkiliy-boshqaruvdagi mustaqillik sohasi bo‘yicha qator vakolatlar beriladi. Bundan tashqari, universitet 2022-yil 1-yanvardan boshlab o‘zini o‘zi moliyalashtirish tizimiga o‘tadi.
Shuningdek qaror bilan, 2025-yilgacha Universitetni transformatsiya qilish va kompleks rivojlantirish dasturi va uning xalqaro nufuzini oshirish bo‘yicha maqsadli ko‘rsatkichlar tasdiqlandi.
Qaror bilan quyidagilar tashkil etildi:
- universitet huzurida Fundamental va amaliy tadqiqotlar instituti;
- universitetning Buxoro filiali negizida Buxoro tabiiy resurslarni boshqarish instituti;
- universitetning Qarshi filiali negizida Qarshi irrigatsiya va agrotexnologiyalar instituti.
- universitet faoliyatini rivojlantirish jamg‘armasi tashkil etiladi.
Bundan avval Toshkent davlat stomatologiya instituti bitiruvchilarining diplomi endi jahon miqyosida tan olinishi, Toshkent davlat yuridik universitetiga yangi rektor tayinlangani hamda Termiz muhandislik-texnologiya instituti tashkil etilgani haqida xabar berilgandi.
Izoh (0)