Farg‘ona viloyatining aholi gavjum joylari — bozorlarning kirish qismi va maktablar yaqiniga quyosh batareyalari yordamida ishlaydigan ko‘chma svetoforlar o‘rnatilmoqda. Bu haqda “Daryo” muxbiri Azizbek Abduvaliyev xabar berdi.
Mazkur qurilma loyihasi Farg‘ona politexnika instituti olimlari tomonidan ishlab chiqilgan va viloyatdagi “Oltiariq-innovatsiya” korxonasi mutaxassislari tomonidan tayyorlanmoqda.
“Oltiariq tumanining o‘zi ‘Innovatsion hudud’ deb e’lon qilingan. Bu yerda bugungi kunda jami 5,8 milliard so‘mlik 9 ta loyiha amalga oshirilmoqda. Ular orasida yo‘llarda avtomobillarning doimiy harakatidan uzluksiz elektr energiyasi olish, baliq uni va biogumus tayyorlash, chiqindilardan polistirol ishlab chiqarish kabi istiqbolli loyihalar bor. ‘Aqlli’ svetofor esa shulardan biri. Uning odatiy svetoforlardan afzallik tomonlari ko‘p: elektr energiyasi talab qilmaydi, piyodalar o‘tish joylarida foydalanish mumkin, boshqaruvi avtomatlashtirilgan, belgilangan manzilga olib borish, o‘rnatish va ishlatish qulay”, — deydi viloyat Innovatsion rivojlanish boshqarmasi bosh mutaxassisi O‘ktamjon Qodirov.
Ushbu loyiha Innovatsion rivojlanish vazirligi tomonidan ma’qullandi va uni amalga oshirish uchun 618 million so‘m mablag‘ ajratildi.
Qayd etish joizki, quyosh paneli yordamida ishlaydigan svetoforlar elektr energiyasi ta’minotida uzilishlar kuzatilayotgan hozirgi sharoitda juda qulay. Qolaversa, davlat tomonidan o‘rnatiladigan svetoforlardan ancha arzon. Jumladan, mobil svetofor 15 million, piyodalar uchun mo‘ljallangani 40 million, chorrahalarda qo‘llanadigani esa 100 million so‘m atrofida.
Hozirda bunday qurilmalardan 40 dan ortig‘i viloyatning Marg‘ilon, Dang‘ara, Yozyovon, Furqat, Qo‘shtepa, Buvayda, Rishton va Oltiariq tumanlarida foydalanilmoqda. Ularga boshqa viloyatlardan ham buyurtmalar tushmoqda. Jumladan, bugungi kungacha “aqlli” svetoforlar Surxondaryo viloyatining Oltinsoy va Buxoro viloyatining Romitan tumanlarida o‘rnatildi.
Izoh (0)