Шавкат Мирзиёевнинг «Иқтисодиёт тармоқлари учун муҳандис кадрларни тайёрлаш тизимини инновация ва рақамлаштириш асосида тубдан такомиллаштириш чора-тадбирлари тўғрисида» қарори имзоланди.
Президент қарорига асосан Тошкент ирригация ва қишлоқ хўжалигини механизациялаш муҳандислари институти «Тошкент ирригация ва қишлоқ хўжалигини механизациялаш муҳандислари институти» миллий тадқиқот университети деб қайта номланди.
Қарорга мувофиқ университет фаолиятини мувофиқлаштириш бўйича бошқарув кенгаши ташкил этилди ва университетнинг молиявий ҳамда бошқа стратегик масалаларини ҳал қилиш ваколати мазкур кенгашга берилди.
Бошқарув кенгашига бош вазир ўринбосари — инвестициялар ва ташқи савдо вазири Сардор Умурзоқов раҳбарлик қилади.
Шунингдек, университетда Трансформация офиси ҳам таъсис этилмоқда.
Трансформация офиси университетни трансформация қилиш ва комплекс ривожлантириш дастурини амалга ошириш ҳамда 2025 йилга қадар халқаро тан олинган ташкилотларнинг олий таълим муассасалари рейтингида биринчи 1000 талик рўйхатга киритиш каби масалалар учун масъул бўлади.
Шу билан бирга, университетга 2022/2023-ўқув йилидан бошлаб академик ҳамда ташкилий-бошқарувдаги мустақиллик соҳаси бўйича қатор ваколатлар берилади. Бундан ташқари, университет 2022 йил 1 январдан бошлаб ўзини ўзи молиялаштириш тизимига ўтади.
Шунингдек қарор билан, 2025 йилгача Университетни трансформация қилиш ва комплекс ривожлантириш дастури ва унинг халқаро нуфузини ошириш бўйича мақсадли кўрсаткичлар тасдиқланди.
Қарор билан қуйидагилар ташкил этилди:
- университет ҳузурида Фундаментал ва амалий тадқиқотлар институти;
- университетнинг Бухоро филиали негизида Бухоро табиий ресурсларни бошқариш институти;
- университетнинг Қарши филиали негизида Қарши ирригация ва агротехнологиялар институти.
- университет фаолиятини ривожлантириш жамғармаси ташкил этилади.
Бундан аввал Тошкент давлат стоматология институти битирувчиларининг дипломи энди жаҳон миқёсида тан олиниши, Тошкент давлат юридик университетига янги ректор тайинлангани ҳамда Термиз муҳандислик-технология институти ташкил этилгани ҳақида хабар берилганди.
Изоҳ (0)