O‘zbekistonda korrupsiyaga oid jinoyatlar uchun javobgarlik choralari keskin kuchaytirish nazarda tutilgan qonun loyihasi Oliy Majlis deputatlari tomonidan birinchi o‘qishda qabul qilindi.
Oliy Majlis Qonunchilik palatasining 3-dekabr kuni ilk bor jonli efirda namoyish etilgan navbatdagi majlisida deputatlar “O‘zbekiston Respublikasining Jinoyat kodeksiga korrupsiyaga oid jinoyatlar uchun javobgarlik muqarrarligini ta’minlashga qaratilgan o‘zgartish va qo‘shimchalar kiritish to‘g‘risida”gi qonun loyihasini birinchi o‘qishda ko‘rib chiqdi va bir ovozdan qabul qildi.
Ushbu qonun loyihasini 107 nafar deputat ma’qullab ovoz bergan, 1 nafari ovoz bermagan, qarshilar va betaraflar yo‘q.
Majlisda ta’kidlanishicha, mazkur hujjat bilan Jinoyat kodeksining 8-bo‘limi “korrupsiyaga oid jinoyatlar” degan yangi atama bilan to‘ldirilmoqda. Korrupsiyaga oid jinoyatlar uchun aybdor shaxsga nisbatan jazo choralarini yanada kuchaytirish maqsadida Jinoyat kodeksining 167 va 168-moddalarida ko‘rsatilgan jinoyatlar mansab mavqeyini suiiste’mol qilish yoki xizmat mavqeyidan foydalanib sodir etilganligi ushbu moddalarning og‘irroq qismiga o‘tkazilib, mazkur qilmishlar uchun 10 yilgacha (ilgari 5 yilgacha edi) ozodlikdan mahrum qilish jazosi nazarda tutilmoqda.
Shuningdek, korrupsiyaga oid jinoyatlar uchun javobgarlikning muqarrarligini ta’minlash, bunday jinoyatlarni sodir etgan shaxslarga yengillashtiruvchi normalarni qo‘llashni cheklash maqsadida qator normalarga o‘zgartish va qo‘shimchalar kiritilmoqda.
Xususan, Jinoyat kodeksining 73 va 74-moddalarida o‘zlashtirish yoki rastrata yo‘li bilan talon-toroj qilish, firibgarlik, soliqlar yoki boshqa majburiy to‘lovlarni to‘lashdan bo‘yin tovlash uchun hukm qilingan, biroq jinoyat oqibatida yetkazilgan zararni to‘liq qoplamagan shaxslarga hamda poraxo‘rlik bilan bog‘liq jinoyatlarni sodir etgan shaxslarga nisbatan jazodan muddatidan ilgari shartli ravishda ozod qilish, jazoni yengilrog‘i bilan almashtirish tatbiq qilinmasligi belgilanmoqda.
Korrupsiyaga qarshi kurashish agentligi direktori Akmal Burhonov pora olish, pora berish va pora olish-berishda vositachilik qilish jinoyatlari uchun 20 yilgacha ozodlikdan mahrum qilish jazosi belgilanayotganini ham qayd etgandi. “Eng asosiysi, poraxo‘rlik jinoyatlarini sodir etgan shaxslar jazoni o‘tashdan muddatidan ilgari shartli ozod qilinmasligi va jazo yengilrog‘i bilan almashtirilmasligi va boshqa qator dolzarb o‘zgartish va qo‘shimchalar kiritilmoqda”, — degan edi Akmal Burhonov.
Izoh (0)