Олий Мажлис депутатлари пора олди-бердиси учун 20 йилгача озодликдан маҳрум қилиш жазоси кўзда тутилган қонун лойиҳасини биринчи ўқишда қабул қилди

Ўзбекистонда коррупцияга оид жиноятлар учун жавобгарлик чоралари кескин кучайтириш назарда тутилган қонун лойиҳаси Олий Мажлис депутатлари томонидан биринчи ўқишда қабул қилинди.

Олий Мажлис Қонунчилик палатасининг 3 декабрь куни илк бор жонли эфирда намойиш этилган навбатдаги мажлисида депутатлар «Ўзбекистон Республикасининг Жиноят кодексига коррупцияга оид жиноятлар учун жавобгарлик муқаррарлигини таъминлашга қаратилган ўзгартиш ва қўшимчалар киритиш тўғрисида»ги қонун лойиҳасини биринчи ўқишда кўриб чиқди ва бир овоздан қабул қилди.

Ушбу қонун лойиҳасини 107 нафар депутат маъқуллаб овоз берган, 1 нафари овоз бермаган, қаршилар ва бетарафлар йўқ.

Мажлисда таъкидланишича, мазкур ҳужжат билан Жиноят кодексининг 8-бўлими «коррупцияга оид жиноятлар» деган янги атама билан тўлдирилмоқда. Коррупцияга оид жиноятлар учун айбдор шахсга нисбатан жазо чораларини янада кучайтириш мақсадида Жиноят кодексининг 167 ва 168-моддаларида кўрсатилган жиноятлар мансаб мавқейини суиистеъмол қилиш ёки хизмат мавқейидан фойдаланиб содир этилганлиги ушбу моддаларнинг оғирроқ қисмига ўтказилиб, мазкур қилмишлар учун 10 йилгача (илгари 5 йилгача эди) озодликдан маҳрум қилиш жазоси назарда тутилмоқда.

Шунингдек, коррупцияга оид жиноятлар учун жавобгарликнинг муқаррарлигини таъминлаш, бундай жиноятларни содир этган шахсларга енгиллаштирувчи нормаларни қўллашни чеклаш мақсадида қатор нормаларга ўзгартиш ва қўшимчалар киритилмоқда.

Хусусан, Жиноят кодексининг 73 ва 74-моддаларида ўзлаштириш ёки растрата йўли билан талон-торож қилиш, фирибгарлик, солиқлар ёки бошқа мажбурий тўловларни тўлашдан бўйин товлаш учун ҳукм қилинган, бироқ жиноят оқибатида етказилган зарарни тўлиқ қопламаган шахсларга ҳамда порахўрлик билан боғлиқ жиноятларни содир этган шахсларга нисбатан жазодан муддатидан илгари шартли равишда озод қилиш, жазони енгилроғи билан алмаштириш татбиқ қилинмаслиги белгиланмоқда.

Коррупцияга қарши курашиш агентлиги директори Акмал Бурҳонов пора олиш, пора бериш ва пора олиш-беришда воситачилик қилиш жиноятлари учун 20 йилгача озодликдан маҳрум қилиш жазоси белгиланаётганини ҳам қайд этганди. «Энг асосийси, порахўрлик жиноятларини содир этган шахслар жазони ўташдан муддатидан илгари шартли озод қилинмаслиги ва жазо енгилроғи билан алмаштирилмаслиги ва бошқа қатор долзарб ўзгартиш ва қўшимчалар киритилмоқда», — деган эди Акмал Бурҳонов.