2-dekabr kuni Oliy Majlis Senatining prokuratura organlari faoliyati ustidan nazorat qiluvchi komissiyasi yig‘ilishi bo‘lib o‘tdi, deb xabar beradi parlament yuqori palatasi matbuot xizmati.
Yig‘ilishda senatorlar tomonidan Andijon viloyati sektor rahbarlarining yoshlar muammolarini tizimli ravishda hal etish borasidagi vazifalari aniq belgilangan bo‘lsa-da, viloyatdagi o‘rganish davomida bir qator kamchiliklarga yo‘l qo‘yilgani tanqid qilingan.
Jumladan, yoshlarning bandligini ta’minlash, ularning muammolarini hal etish maqsadida ishlab chiqilgan “Yoshlardaftari.uz” yagona elektron platformasiga kiritilgan 735 nafar yoshlar asossiz ravishda chiqarib yuborilish holatlari aniqlangan.
“Yoshlar daftari”ga kiritilganlardan 23 479 nafariga tuman hokimlarining farmoyishlari asosida yer maydonlari ajratilib, bandligi ta’minlangani va daftardan chiqarilgani o‘rganilganda, ulardan 44 nafar yoshlar yer maydonlarini olmagani, hattoki bundan xabardor emasligi ma’lum bo‘lgan.
Bundan tashqari, Vazirlar Mahkamasining 2021-yil 28-apreldagi 250-sonli qarori bilan tasdiqlangan vaqtinchalik tartibga muvofiq, sektorlar rahbarlari elektron anketa so‘rovnomalari ma’lumotlari asosida “yoshlar daftari”ga kiritilgan yoshlarning muammolarini bartaraf etishga qaratilgan “yo‘l xaritasi” loyihasini ishlab chiqishi va xalq deputatlari tuman (shahar) kengashlariga tasdiqlash uchun kiritishi belgilangan. Biroq Oltinko‘l, Andijon, Baliqchi, Izboskan va Xo‘jaobod tumanlarining barcha sektor rahbarlari tomonidan o‘rganilgan yoshlar muammolarini bartaraf etishga qaratilgan “yo‘l xaritalari” loyihalari ishlab chiqilmagan va xalq deputatlari tuman Kengashiga taqdim etilmagan.
Andijon shahar, Izboskan, Xo‘jaobod va Andijon tumanlarida sektor rahbari va arizachi o‘rtasida bir martalik moddiy yordam berish, uni olgan yosh bilan ishga kirish, kasb o‘rganish, o‘zini-o‘zi band qilish kabi majburiyatlarni olishini nazarda tutuvchi ikki tomonlama ijtimoiy shartnoma tuzilmasdan moddiy yordamlar maqsadsiz ajratilgan.
Shuningdek, Vazirlar Mahkamasining 2021-yil 11-martdagi 132-son qaroriga asosan viloyatlar va tuman (shahar)lar mahalliy budjetlarida shakllangan qo‘shimcha manbalarning kamida 15 foizi miqdori har chorakda “yoshlar daftari” jamg‘armasiga o‘tkazilishi belgilangan bo‘lsada, viloyatning Andijon shahri, Xo‘jaobod va Izboskan tumanlarida bunga amal qilinmagan.
Shaxsga bir martalik moddiy yordam berilishi uni “yoshlar daftari”dan chiqarishga asos bo‘lmasligi belgilanganiga qaramay Andijon shahrida Yoshlar jamg‘armasi tomonidan bir martalik yordam berilgan jami 790 nafar yoshlardan 303 nafari “yoshlar daftari”dan asossiz ravishda chiqarib yuborilgan.
Tuman (shahar) hokimlarining qarorlari bilan zaxiraga olingan ish o‘rinlariga aholining ijtimoiy ehtiyojmand toifalarini ishga joylashtirish ishlari sust olib borilgan. Ya’ni zaxira (kvota)langan ish o‘rinlaridan foydalanish darajasi viloyatda 64,2 foizni tashkil etganligi bois, bugungi kunda 3 651 ta zaxira ish o‘rinlari foydalanmasdan qolgan.
Yig‘ilishda ushbu yo‘nalishda uchrayotgan tizimli xato va kamchiliklarni bartaraf etish maqsadida prokuratura organlari, Bandlik va mehnat munosabatlari vazirligi hamda viloyat hokimligiga Komissiya a’zolari tomonidan tavsiyalar berilib, tegishli topshiriqlar aks ettirilgan qaror qabul qilingan.
Avvalroq Qashqadaryoda “ayollar daftari” va “yoshlar daftari”ga kiritilgan 2 mingga yaqin fuqaroga kredit berilgani yolg‘on bo‘lib chiqqan edi. Keyinroq Yoshlar ishlari agentligi mazkur holatlar haqiqatan ham yuzaga kelganini tasdiqlab, vaziyatning yuzaga kelishida agentlik mas’ullari emas, joylardagi sektor rahbarlari hamda sektor kotiblarining aybi borligini ta’kidlagan edi.
Izoh (0)