ATTO kompaniyasi Toshkent transport boshqarmasi bilan birgalikda yo‘nalishli taksilarda transport kartalari va bank kartalari (Uzcard kobeydj, Humo, Humans, Visa, Mastercard, “Mir”, China Union Pay) orqali yo‘l haqi uchun to‘lov amalga oshirishni bosqichma-bosqich joriy etmoqda. Bu haqda kompaniya matbuot xizmati xabar berdi.
Ma’lum qilinishicha, hozirgi paytda 27m, 34m, 68m, 52m, 110m, 135m yo‘nalishli taksilarda ATTO avtomatlashtirilgan to‘lov tizimi orqali to‘lovlarni qabul qilish imkoniyati joriy qilingan bo‘lib, tez orada 63m, 171m, 11m, 92m, 111m, 191m, 31m, 11i, 19i, 18m, 166m, 41m sonli yo‘nalishlarda ham ushbu tizim orqali to‘lovlarni amalga oshirish mumkin bo‘ladi. 2022-yil mobaynida esa poytaxtdagi barcha yo‘nalishli taksilarda ATTO tizimi orqali to‘lovlarni qabul qilishni joriy etish rejalashtirilgan.
Ma’lumot uchun, birinchi yo‘nalishli taksi 2021-yilning avgust oyida avtomatlashtirilgan to‘lov tizimiga qo‘shilgan. Yo‘lovchilar orasida qiziqishni oshirish uchun dastlabki ikki oy mobaynida aksiya joriy etilib, transport kartasi bilan to‘lashda yo‘l haqi narxi 200 so‘mga arzonlashtirilgan edi.
Avgust oyi oxirida transport kartalari orqali 5,1 ming tranzaksiya qayd etilgan bo‘lsa, sentabrda — 7,3 ming. Oktabr oyida raqamlar 8,8 ming tranzaksiyani tashkil etgan, bu avgustga nisbatan 70 foizga ko‘proq. Ko‘rsatgichlarga ko‘ra, noyabr oyining oxiriga kelib, yo‘nalishli taksilarda transport kartalari orqali to‘lov ko‘rsatkichlari 9,2 ming tranzaksiyadan oshadi.
Uch oylik monitoring natijalariga ko‘ra, “Buyuk ipak yo‘li” metro bekatidan Mirzo Ulug‘bek qo‘rg‘onigacha bo‘lgan “135-son” yo‘nalishli taksi yo‘lovchilar orasida eng mashhur taksi etib belgilangan. Yo‘nalishli taksi uchun jami to‘lovlarning 41 foizini tashkil etgan.
Eslatib o‘tamiz, Toshkent shahar jamoat transporti — avtobus va metropoliten yo‘nalishlarida avtomatlashtirilgan to‘lov tizimini joriy etish ishlari 2021-yil 1-yanvadan boshlangan. ATTO operatori tomonidan taqdim etilgan imtiyozli (talaba, ijtimoiy, o‘quvchi) transport kartalari esa 2021-yil 1-yanvardan boshlab amalga kiritildi.
Izoh (0)