АТТО компанияси Тошкент транспорт бошқармаси билан биргаликда йўналишли таксиларда транспорт карталари ва банк карталари (Uzcard кобейдж, Humo, Humans, Visa, Mastercard, «Мир», China Union Pay) орқали йўл ҳақи учун тўлов амалга оширишни босқичма-босқич жорий этмоқда. Бу ҳақда компания матбуот хизмати хабар берди.
Маълум қилинишича, ҳозирги пайтда 27м, 34м, 68м, 52м, 110м, 135м йўналишли таксиларда АТТО автоматлаштирилган тўлов тизими орқали тўловларни қабул қилиш имконияти жорий қилинган бўлиб, тез орада 63м, 171м, 11м, 92м, 111м, 191м, 31м, 11i, 19i, 18м, 166м, 41м сонли йўналишларда ҳам ушбу тизим орқали тўловларни амалга ошириш мумкин бўлади. 2022 йил мобайнида эса пойтахтдаги барча йўналишли таксиларда АТТО тизими орқали тўловларни қабул қилишни жорий этиш режалаштирилган.
Маълумот учун, биринчи йўналишли такси 2021 йилнинг август ойида автоматлаштирилган тўлов тизимига қўшилган. Йўловчилар орасида қизиқишни ошириш учун дастлабки икки ой мобайнида акция жорий этилиб, транспорт картаси билан тўлашда йўл ҳақи нархи 200 сўмга арзонлаштирилган эди.
Август ойи охирида транспорт карталари орқали 5,1 минг транзакция қайд этилган бўлса, сентябрда — 7,3 минг. Октябрь ойида рақамлар 8,8 минг транзакцияни ташкил этган, бу августга нисбатан 70 фоизга кўпроқ. Кўрсатгичларга кўра, ноябрь ойининг охирига келиб, йўналишли таксиларда транспорт карталари орқали тўлов кўрсаткичлари 9,2 минг транзакциядан ошади.
Уч ойлик мониторинг натижаларига кўра, «Буюк ипак йўли» метро бекатидан Мирзо Улуғбек қўрғонигача бўлган «135-сон» йўналишли такси йўловчилар орасида энг машҳур такси этиб белгиланган. Йўналишли такси учун жами тўловларнинг 41 фоизини ташкил этган.
Эслатиб ўтамиз, Тошкент шаҳар жамоат транспорти — автобус ва метрополитен йўналишларида автоматлаштирилган тўлов тизимини жорий этиш ишлари 2021 йил 1-янвадан бошланган. АТТО оператори томонидан тақдим этилган имтиёзли (талаба, ижтимоий, ўқувчи) транспорт карталари эса 2021 йил 1 январдан бошлаб амалга киритилди.
Изоҳ (0)