Qoraqalpog‘iston Respublikasi, viloyatlar markazlari va Toshkent shahrida ommaviy tadbirlarni o‘tkazishda hamda istirohat bog‘lari, xiyobonlar va bozorlarda jamoat tartibini saqlashni tashkil etish bevosita Milliy gvardiya bo‘linmalari tomonidan amalga oshirilishi belgilandi. Bu haqda prezidentning jamoat xavfsizligi konsepsiyasini tasdiqlash va uni amalga oshirish chora-tadbirlari to‘g‘risidagi farmonida keltirilgan, deb xabar beradi O‘zA.
Farmon bilan Milliy gvardiya qo‘mondoniga Adliya vazirligi bilan birgalikda bir oy muddatda jamoat tartibini saqlash sohasida sodir etiladigan ma’muriy huquqbuzarliklar to‘g‘risidagi ishlarni ko‘rib chiqish vakolati ichki ishlar organlari bilan bir qatorda Milliy gvardiyaga berilishi bo‘yicha qonun loyihasini kiritish vazifasi yuklangan.
Shuningdek, bir oy muddatda hududlarning xususiyatlaridan kelib chiqqan holda jamoat tartibini saqlash faoliyatini samarali tashkil etish maqsadida 2022-yilda Namangan, Farg‘ona, Andijon va Surxondaryo viloyatlaridagi, 2023-yilda Qoraqalpog‘iston Respublikasi, Samarqand va Qashqadaryo viloyatlaridagi Milliy gvardiyaning harbiy qismlarida muddatli harbiy xizmatni kengaytirish bo‘yicha asoslantirilgan takliflar kiritiladi.
Bundan tashqari, hujjatga muvofiq Ichki ishlar vazirligi va Milliy gvardiya ikki oy muddatda ijtimoiy himoya choralarini qo‘llashning aniq va to‘liq mexanizmlarini belgilovchi hukumat qarorlari loyihalarini Vazirlar Mahkamasiga kiritishi belgilangan.
Mazkur loyihalar ichki ishlar organlari va Milliy gvardiyaning shaxsiy tarkib va uning oila a’zolarini ijtimoiy himoya qilishga doir barcha qonun va qonunosti hujjatlarning normalarini yagona normativ-huquqiy hujjatda aks ettirishi kerak.
Avvalroq O‘zbekiston Milliy gvardiyasi xodimlariga fuqarolarning avtomobillaridan majburiy tarzda foydalanishga ruxsat berilgan edi.
Izoh (0)