Ҳукумат қарори билан «Сунъий интеллект технологияларини қўллаб-қувватлаш учун махсус режим ташкил этиш ва унинг фаолиятини йўлга қўйиш тартиби тўғрисида»ги низом тасдиқланди. Бу ҳақда Telegram’даги «Ҳуқуқий ахборот» канали хабар қилди.
Низомга мувофиқ, махсус режим IT-паркнинг алоҳида бўғини бўлиб, у ерда ҳуқуқий енгилликлар яратилади ва юридик шахслар ҳамда илмий ташкилотлар томонидан дастурий маҳсулотлар тажрибадан ўтказилади, шунингдек, амалиётга жорий қилинади.
Маълум қилинишича, махсус режим иштирокчиси бўлиш учун талабгорлар IT-паркнинг махсус веб-платформаси орқали ариза топширади. Аризалар Ахборот технологиялари ва коммуникацияларини ривожлантириш вазирлиги томонидан 5 иш кунида дастлабки техник экспертизадан ўтказилади.
Қайд этилишича, эксперт кенгаши ва Мувофиқлаштириш комиссияси хулосалари асосида вазирлик талабгорларни иштирокчи сифатида рўйхатга олиш ёки рўйхатга олишни рад этиш тўғрисида қарор қабул қилади. Махсус режим иштирокчилари ўз ходимлари малакасини ошириш ва қайта тайёрлашга сарфланган харажатлари давлат томонидан компенсация қилинади.
Шунингдек, иштирокчиларга тажриба-синов лойиҳаларини амалга ошириш учун зарур бўлган маълумот ҳамда ҳужжатларни, шахсга доир эгасизлаштирилган маълумотларни вазирлик, идора ва ташкилотлардан олиш ҳуқуқи берилади.
Эслатиб ўтамиз, аввалроқ Ўзбекистонда сунъий интеллект асосида матнни ўқиб берувчи биринчи ўзбек нутқ синтезатори яратилганди. Ғоя муаллифининг маълум қилишича, дастур кўзи ожизларга ўзбекча матн билан ишлашда қулайлик яратиш мақсадида яратилган.
Изоҳ (0)